ໃນ​ລະ​ຫວ່າງ​ວັນ​ທີ​ 29 ​ກັນ​ຍາ​ - 1 ​ຕຸ​ລາ​ 2005 ອົງ​ການ​ປະ​ກັນ​ສັງ​ຄົມ​ແຫ່ງ​ ສປ​ປ ​ລາວ​ ​ໄດ້​ຮັບ​ກຽດ​ເປັນ​ເຈົ້າ​ພາບ​ ​ຕາມ​ຮອບ​ວຽນ​ຈັດ​ກອງ​ປະ​ຊຸມ​ສະ​ມາ​ຄົມ​ປະ​ກັນ​ສັງ​ຄົມ​ອາ​ຊຽນ​ (ອາຊາ) ​ຄັ້ງ​ທີ່​ 16 ​ຂຶ້ນ​ຢູ່​ທີ່​ໂຮງ​ແຮມ​ລາວ​ພລາ​ຊາ​, ​ນະ​ຄອນ​ຫຼວງ​ວຽງ​ຈັນ​. ​ກອງ​ປະ​ຊຸມ​ຄັ້ງ​ນີ້​ມີ​ຜູ້​ແທນ​ຈາກ​ບັນ​ດາ​ 8 ​ປະ​ເທດ​ສະ​ມາ​ຊິກ​, ​ບັນ​ດາ​ຜູ້​ສັງ​ເກດ​ການ​ ​ແລະ​ ​ນັກ​ບັນ​ຍາຍ​ຮັບ​ເຊີນ​ ​ເຂົ້າ​ຮ່ວມ​ທັງ​ໝົດ​ 75 ​ທ່ານ​. ກອງ​ປະ​ຊຸມ​ໄດ້​ເລີ່ມ​ຕົ້ນ​ຂຶ້ນ​ໃນ​ວັນ​ທີ​ 29 ​ກັນ​ຍາ​ 2005 ​ໂດຍ​ການ​ສຳ​ມະ​ນາ​ທາງ​ວິ​ຊາ​ການ​ກ່ອນ​ກອງ​ປະ​ຊຸມ​ ອາຊາ ​ເປັນ​ເວລາ​ 1 ​ວັນ​ເຕັມ​.

​ຊຶ່ງ​ບັນ​ດາ​ອົງ​ການ​ສະ​ມາ​ຊິກ​ ASSA ​ກໍ​ຄື​ບັນ​ດາ​ຜູ້​ເຂົ້າ​ຮ່ວມ​ອື່ນໆ​ໄດ້​ຮັບ​ຟັງ​ ​ແລະ​ ​ຮຽນ​ຮູ້​ ​ຈາກ​ນັກ​ບັນ​ຍາຍ​ຮັບ​ເຊີນ​ ​ຈຳ​ນວນ​ 5 ​ ທ່ານ​ ​ທີ່​ໄດ້​ມາ​ນຳ​ສະ​ເໜີ​ສະ​ເໜີ​ບົດ​ຮຽນ​ ​ແລະ​ ​ປະ​ສົບ​ການ​ທີ່​ສຳ​ຄັນ​ ​ແລະ​ ​ເປັນ​ທີ່​ໜ້າ​ສົນ​ໃຈ​ຂອງ​ຕົນ​ໃນ​ຂົງ​ເຂດ​ວຽກ​ງານ​ປະ​ກັນ​ສັງ​ຄົມ​.

 

ລຳ​ດັບ​ຕໍ່​ມາ​ໃນ​ວັນ​ທີ​ 30 ​ກັນ​ຍາ​ 2005 ​ກອງ​ປະ​ຊຸມ​ສະ​ພາ​ບໍ​ລິ​ຫານ​ ASSA ​ຈຶ່ງ​ໄດ້​ເປີດ​ຂຶ້ນ​ຢ່າງ​ເປັນ​ທາງ​ການ​ ​ໂດຍ​ ​ຕົວ​ແທນ​ຈາກ​ 3 ​ສະ​ຖາ​ບັນ​ ​ປະ​ກັນ​ສັງ​ຄົມ​ທີ່​ເປັນ​ສະ​ມາ​ຊິກ​ ASSA ​ອັນ​ໄດ້​ແກ່​: PT. ASKES, ​ຈາກ​ອິນ​ໂດ​ເນ​ເຊຍ​; Social Security System, ​ປະ​ເທດ​ຟີ​ລິບ​ປິນ​; ​ແລະ​ ​ອົງ​ການ​ປະ​ກັນ​ສັງ​ຄົມ​ຂອງ​ ​ສປ​ປ ​ລາວ​ ​ໄດ້​ຂຶ້ນ​ມາ​ນຳ​ສະ​ເໜີ​ ​ບົດ​ຮຽນ​ທີ່​ດີ​ຂອງ​ຕົນ​. ​ຈາກ​ນັ້ນ​ Ms. Orie Andari Sutadji, ​ປະ​ທານ​ ASSA ​ໄດ້​ກ່າວ​ເປີດ​ກອງ​ປະ​ຊຸມ​ສະ​ພາ​ ​ບໍ​ລິ​ຫານ​ ASSA ​ຢາງ​ເປັນ​ທາງ​ການ​ ​ໂດຍ​ ​ກອງ​ປະ​ຊຸມ​ໄດ້​ສົນ​ທະ​ນາ​ກັນ​ກ່ຽວ​ກັບ​ບັນ​ຫາ​ທີ່​ສຳ​ຄັນ​ສຳ​ຄັນ​ຂອງ​ ASSA, ​ເປັນ​ຕົ້ນ​ແມ່ນ​ການ​ຝຶກ​ອົບ​ຮົມ​ ​ແລະ​ ​ການ​ ​ທັດ​ສະ​ນະ​ສຶກ​ສາ​ວຽກ​ງານ​ປະ​ກັນ​ສັງ​ຄົມ​ຂອງ​ບັນ​ດາ​ສະ​ຖາ​ບັນ​ ​ທີ່​ເປັນ​ສະ​ມາ​ຊິກ​ຂອງ​ ASSA ​ແລະ​ ​ບັນ​ຫາ​ອື່ນໆ​ອີກ​. ໃນ​ດ້ານ​ການ​ແລກ​ປ່ຽນ​ວັດ​ທະ​ນະ​ທຳ​, ​ບັນ​ດາ​ກຳ​ມະ​ການ​ສະ​ພາ​ບໍ​ລິ​ຫານ​ ASSA ​ທຸກ​ທ່ານ​ໄດ້​ພ້ອມ​ກັນ​ ​ໃສ່​ເສື້ອ​ໄໝ​ລາວ​ອັນ​ສວຍ​ສົດ​ງົດ​ງາມ​ທີ່​ ​ອປສ​ ​ໄດ້​ກະ​ກຽມ​ໄວ້​ໃຫ້​ ​ເຂົ້າ​ຮ່ວມ​ກອງ​ປະ​ຊຸມ​ ​ຊຶ່ງ​ເປັນ​ສັນ​ຍາ​ລັກ​ແຫ່ງ​ການ​ ​ລວມ​ພະ​ລັງ​ເປັນ​ ASSA ​ໜຶ່ງ​ດຽວ​. ​ໃນ​ລະ​ຫວ່າງ​ການ​ດຳ​ເນີນ​ກອງ​ປະ​ຊຸມ​ນີ້​ ​ບັນ​ດາ​ຜູ້​ແທນ​ກໍ​ໄດ້​ເດີນ​ທາງ​ໄປ​ຢ້ຽມ​ ​ຊົມ​ສະ​ຖານ​ທີ່​ສຳ​ຄັນ​ທາງ​ປະ​ຫວັດ​ສາດ​, ​ວັດ​ທະ​ນະ​ທຳ​ ​ແລະ​ ​ທຳ​ມະ​ຊາດ​ຈຳ​ນວນ​ໜຶ່ງ​ເຊັ່ນ​: ​ຫໍ​ພິ​ພິ​ທະ​ພັນ​ ​ໄກ​ສອນ​ ​ພົມ​ວິ​ຫານ​, ​ສູນ​ຫັດ​ຖະ​ກຳ​ນິ​ກອນ​, ​ເຂື່ອນ​ໄຟ​ຟ້າ​ນ້ຳ​ງື່ມ​ ​ແລະ​ ​ອ່າງ​ນ້ຳ​ງື່ມ​.

​ເຖິງ​ວ່າ​ປະ​ເທດ​ລາວ​ບໍ່​ມີ​ທະ​ເລ​, ​ແຕ່​ການ​​ລ່ອງ​ເຮືອ​ໄປ​ຕາມ​ອ່າງ​ນ້ຳງື່ມ ​ອັນ​ກວ້າງ​ໃຫຍ່​ຂອງ​ລາວ​ ​ກໍ​ເປັນ​ສິ່ງ​ທີ່​ເຮັດ​ໃຫ້​ບັນ​ດາ​ຜູ້​ແທນ​ມີ​ຄວາມ​ປະ​ທັບ​ໃຈ​ບໍ່​ໜ້ອຍ​. ​ນອກ​ຈາກ​ນີ້​, ​ເຂົາ​ເຈົ້າ​ກໍ​ຍັງ​ໄດ້​ສຳ​ຜັດ​ກັບ​ການ​ສະ​ແດງ​ສີ​ລະ​ປະ​ທີ່​ເປັນ​ເອ​ກະ​ລັກ ​ທາງ​ດ້ານ​ວັດ​ທະ​ນະ​ທຳ​ ​ຂອງ​ລາວ​ ​ເຮົາ​ເຊັ່ນ​: ​ບົດ​ເພັງ​, ​ບົດ​ຟ້ອນ​ອັນ​ງົດ​ງາມ​ຕ່າງໆ​ ​ແລະ​ ​ບົດ​ຟ້ອນ​ດາບ​ອັນ​ໜ້າ​ມະ​ຫັດ​ສະ​ຈັນ​ຂອງ​ຊາວ​ບ້ານ​ປາກ​ ​ຄະ​ຍຸງ​. ​ຄຽງ​ຄູ່​ກັນ​ນີ້​, ​ໜ່ວຍ​ງານ​ສີ​ລະ​ປະ​ ​ກໍ​ຍັງ​ໄດ້​ຮ້ອງ​ເພງ​ຂອງ​ແຕ່​ລະ​ປະ​ເທດ​ສະ​ມາ​ຊິກ​ ASSA ​ເຊັ່ນ​ກັນ​. ​ພິ​ເສດ​ ​ບັນ​ດາ​ຜູ້​ແທນ​ໄດ້​ພ້ອມ​ກັນ​ຟ້ອນ​ລຳ​ວົງ​ລາວ​ ​ຢ່າງ​ມ່ວນ​ຊື່ນ​. ກອງ​ປະ​ຊຸມ​ຄັ້ງ​ນີ້​ນອກ​ຈາກ​ບັນ​ດາ​ຜູ້​ເຂົ້າ​ຮ່ວມ​ຈະ​ໄດ້​ຮັບ​ຟັງ​ແລະ​ແລກ ​ປ່ຽນ​ຄວາມ​ຮູ້​ທາງ​ວິ​ຊາ​ການ​ແລ້ວ​ ​ຍັງ​ໄດ້​ເບີກ​ບານ​ມ່ວນ​ຊື່ນ​ໃນ​ການ​ແລກ​ປ່ຽນ​ວັດ​ທະ​ນະ​ທຳ​ນຳ​ກັນ​ອີກ​ດ້ວຍ ​.​ ກອງ​ປະ​ຊຸມ​ຄັ້ງ​ຕໍ່​ໄປ​ຈະ​ຈັດ​ຂຶ້ນ​ຢູ່​ທີ່​ປະ​ເທດ​ບຣູ​ໄນ​.