ເພື່ອເຮັດໃຫ້ວຽກງານປະກັນສັງຄົມຢູ່ໃນທ່າຕັ້ງໜ້າ ແລະ ຂະຫຍາຍຕົວເປັນກ້າວໆ, ພ້ອມທັງເປັນການຕິດຕາມກວດກາບັນດາຂໍ້ຄົງຄ້າງ ແລະ ແກ້ໄຂໃຫ້ທັນກັບສະພາບການ ເພື່ອກ້າວໄປສູ່ການບັນລຸຕົວເລກຄາດໝາຍສູ້ຊົນຕາມທິດທາງແຜນການປີ 2018 ຂອງ ກປຊ,

ຄຽງຄູ່ກັບການຄົ້ນຄ້ວາປັບປຸງບາງເນື້ອໃນຂອງກົດໝາຍວ່າດ້ວຍການປະກັນສັງຄົມ ສະບັບເລກທີ 34/ສພຊ ໃຫ້ມີຄວາມແທດເໝາະໃນແຕ່ລະໄລຍະ.

ໃນຕອນເຊົ້າຂອງວັນທີ 25 ເມສາ 2018 ​ທີ່ ຫ້ອງການກອງທຶນປະກັນສັງຄູົມແຫ່ງຊາດ ໄດ້ຈັດກອງປະຊຸມສະພາບໍລິຫານຄັ້ງທີ XII ຂອງ​ຕົນຂຶ້ນ, ໂດຍການເປັນປະທານຂອງທ່ານ ປ.ອ ຄໍາແພງ ໄຊສົມແພງ ລັດຖະມົນຕີ ກະຊວງ ແຮງງານ ແລະ ສະຫວັດດີການສັງຄົມ, ເຂົ້າຮ່ວມກອງປະຊຸມໃນຄັ້ງນີ້ ມີຮອງປະທານ, ຄະນະກຳມະການສະພາບໍລິຫານ, ຄະນະອຳນວຍການ ແລະ ບັນດາພະແນກການທີ່ກ່ຽວຂ້ອງ ຂອງ ຫ້ອງການກອງທຶນປະກັນສັງຄົມແຫ່ງຊາດ ເຂົ້າຮ່ວມຢ່າງພ້ອມພຽງ.

ຈຸດປະສົງກໍ່ ເພື່ອທົບທວນຄືນໃນການປະຕິບັດວຽກງານປະກັນສັງຄົມໃນໄລຍະທີ່ຜ່ານມາ, ພ້ອມທັງໄດ້ພິຈາລະ ນາ ແລະ ຮັບຮອງເອົາບາງຂໍ້ສະເໜີຂອງກອງ​ທຶນ. ພາຍຫຼັງປະທານກອງປະຊຸມກ່າວເປີດພິທີ ທ່ານ ປະເດີມພອນ ສົນທະນີ ຜູ້ອຳນວຍການ ກປຊ ໄດ້ກ່າວລາຍງານກ່ຽວກັບສະພາບການຈັດຕັ້ງປະຕິບັດວຽກງານປະຈໍາງວດ I ແລະ ຜ່ານທິດທາງແຜນການງວດ II ປີ 2018 ຂອງ ກປຊ, ຊຶ່ງທ່ານໄດ້ລາຍງານໃຫ້ຮູ້ວ່າ: ໃນງວດ I ທີ່ຜ່ານມາ ກປຊ ໄດ້ມີການຈັດຕັ້ງປະຕິບັດໂຄງການຈຸດສຸມຫຼາຍຢ່າງ ເຊັ່ນ: ໄດ້ເຊັນສັນຍາຮ່ວມມືກັບທະນາຄານພັດທະນາລາວເພື່ອນໍາໃຊ້ລະບົບການຈ່າຍເງິນສົມທົບຂອງຜູ້ປະກັນຕົນສະໝັກໃຈຜ່ານລະບົບທະນາຄານພັດທະນາລາວ ໂດຍເລີ່ມໃຫ້ບໍລິການຢູ່ນະຄອນຫຼວງວຽງຈັນກ່ອນ ຫຼັງຈາກນັ້ນຈຶ່ງຂະຫຍາຍລົງສູ່ຕ່າງແຂວງ; ໄດ້ຈັດກອງປະຊຸມຕົວແທນ 3 ຝ່າຍ ເພື່ອປຶກສາຫາລືກ່ຽວກັບການໂຄສະນາປຸກລະດົມ ຂົນຂວາຍກຸ່ມເປົ້າໝາຍໃຫ້ເຂົ້າສູ່ລະບົບປະກັນສັງຄົມ; ໄດ້ແຕ່ງຕັ້ງຄະນະກໍາມະການຮັບຜິດຊອບຄົ້ນຄວ້າ ແລະ ປັບປຸງຕາໜ່າງການບໍລິການລະບົບປະກັນສັງຄົມຂັ້ນເມືອງ ປັບປຸງລະບົບປະສານງານກັບຫ້ອງການ ຮສສ ເມືອງ ແລະ ສ້າງໜ່ວຍບໍລິການກອງທຶນປະກັນສັງຄົມຂັ້ນເມືອງ 5 ແຫ່ງໃນທົ່ວປະເທດ; ໄດ້ເລີ່ມທົດລອງໂຄງການສົ່ງເສີມການໂຄສະນາຜ່ານສື່ສັງຄົມອອນໄລ (Facebook) ແລະ ລົງໂຄສະນາຜ່ານຈໍ LED; ສໍາເລັດໂຄງການສ້າງປື້ມຄູ່ມືການເຄື່ອນໄຫວດ້ານບັນຊີ, ສາລະບານບັນຊີ ແລະ ໂປຼແກຼມບັນຊີ ເພື່ອສະເໜີຕໍ່ ກະຊວງການເງິນ ຮັບຮອງ ແລະອື່ນໆ; ສຳລັບວຽກງານປິ່ນອ້ອມ ກປຊ ແມ່ນໄດ້ສືບຕໍ່ລົງປະຊາສຳພັນໃຫ້ບັນດາອົງການຈັດຕັ້ງລັດ, ຫົວໜ່ວຍວິສາຫະກິດຂອບເຂດທົ່ວປະເທດ ລວມທັງພາກສະໝັກໃຈໄດ້ທັງໝົດ 231 ຄັ້ງ ເທົ່າກັບ 113 % ຂອງແຜນການງວດ I ແລະ ໄດ້ສືບຕໍ່ປະຊາສໍາພັນທາງສື່ມວນຊົນຂະແໜງການຕ່າງໆ ຕາມເນື້ອໃນກົດໝາຍວ່າດ້ວຍການປະກັນສັງຄົມ ໃຫ້ແກ່ບັນດາກຸ່ມເປົ້າໝາຍໄດ້ເຂົ້າໃຈຢ່າງຖືືກຕ້ອງ ໂດຍສະເພາະແມ່ນສິດຜົນປະໂຫຍດທີ່ຈະໄດ້ຮັບຈາກການເຂົ້າເປັນສະມາຊິກປະກັນສັງຄົມ, ຊຶ່ງໃນງວດ I ປີ 2018 ສາມາດຂຶ້ນທະບຽນໃຫ້ກັບຫົວໜ່ວຍແຮງງານວິສາຫະກິດໃໝ່ 83 ຫົວໜ່ວຍ ເທົ່າກັບ 94% ຂອງແຜນການງວດ I ແລະ ມີຜູ້ປະກັນຕົນໃນວິສາຫະກິດໃໝ່ ແລະ ເກົ່າ ທັງໝົດ 6.892 ຄົນ ເທົ່າກັບ 71%; ຂື້ນທະບຽນພະນັກງານລັດຖະກອນໃໝ່ 1.063 ຄົນ ເທົ່າກັບ 142% ແລະ ຂື້ນທະບຽນຜູ້ປະກັນຕົນສະໝັກໃຈໃໝ່ໄດ້ 763 ຄົນ ເທົ່າກັບ 102% ຂອງແຜນການງວດ I ປີ 2018; ມີຜູ້ປະກັນຕົນ ທີ່ໄດ້ຈ່າຍເງິນສົມທົບທັງໝົດ 291.432 ຄົນ; ໃນນີ້ ມີຜູ້ປະກັນຕົນພາກລັດ 182.385 ຄົນ, ພາກວິສາຫະກິດ 102.488 ຄົນ, ຜູ້ສະໝັກໃຈ 6.559 ຄົນ. ປັດຈຸບັນມີຫົວໜ່ວຍແຮງງານວິສາຫະກິດ ທີ່ເຂົ້າເປັນສະມາຊິກປະກັນສັງຄົມໄດ້ຈ່າຍເງິນສົມທົບ 1.878 ຫົວໜ່ວຍ. ສໍາລັບວຽກງານອຸດໜູນໄດ້ດໍາເນີນການພິຈາລະນາ ແລະ ຄິດໄລ່ເງິນອຸດໜູນຕ່າງໆທັງໝົດ 63.273 ກໍລະນີ ເທົ່າກັບ 94% ຂອງແຜນການງວດ, ໃນນີ້ ພາກລັດ 57.402 ກໍລະນີ ເທົ່າກັບ 96%, ພາກວິສາຫະກິດ ແລະ ສະໝັກໃຈ 5.871 ກໍລະນີ ເທົ່າກັບ 78%. ປັດຈຸບັນມີຜູ້ເກີດສິດປິ່ນປົວຕາມເງື່ອນໄຂທັງພາກລັດ ແລະ ພາກວິສາຫະກິດທັງໝົດ 677.506 ຄົນ; ໃນນີ້ພາກລັດ 452.156 ແລະ ພາກວິສາຫະກິດ ລວມທັງພາກສະໝັກໃຈ 225.350 ຄົນ. ສ່ວນວຽກງານການເງິນໃນງວດ I ປີ 2018 ສາມາດປະຕິບັດລາຍຮັບລວມທັງພາກລັດ ແລະ ພາກວິສາຫະກິດໄດ້ທັງໝົດ 370,28 ຕື້ກ່ວາກີບ ເທົ່າກັບ 95,13% ແລະ ລາຍຈ່າຍທັງໝົດ 383,65 ຕື້ກວ່າກີບ ເທົ່າກັບ 96,27% ຂອງແຜນການງວດ, ມີຍອດເຫຼືອລາຍຮັບ-ລາຍຈ່າຍລວມທັງໝົດ -13,36 ຕື້ກວ່າກີບ ໃນນີ້ພາກລັດຂາດດູນ -56,47 ຕື້ກ່ວາກີບ ແລະ ພາກວິສາຫະກິດມີຍອດເຫຼືອ 43,10 ຕື້ກ່ວາກີບ.

ພາບ-ຂ່າວ: ພະແນກປະຊາສໍາພັນ