ຄຽງຄູ່ກັບການປົກປັກຮັກສາ ສ້າງສາ ແລະ ພັດທະນາປະເທດຊາດ, ວຽກງານປະກັນສັງ ຄົມ ແມ່ນໄດ້ຮັບການຍົກລະດັບ ແລະ ປັບປຸງໃຫ້ດີຂື້ນເທື່ອລະກ້າວ ເວົ້າລວມ ເວົ້າສະ ເພາະ ກໍ່ຄື ສິດ ແລະ ຜົນປະໂຫຍດຂອງຜູ້ປະກັນຕົນ ຊຶ່ງໜຶ່ງໃນນັ້ນກໍ່ຄື ການອຸດໜູນ ອອກລູກ ຫຼື ຫຼຸລູກ ສຳລັບຜູ້ປະກັນຕົນເພດຍິງ ທີ່ໄດ້ເລີ່ມຈັດຕັ້ງປະຕິບັດນັບແຕ່ວັນທີ 01 ຕຸລາ 2014 ເປັນຕົ້ນມາ ພາຍໃຕ້ກົດໝາຍວ່າດ້ວຍການປະກັນສັງຄົມ ສະບັບເລກທີ 34/ສພຊ.

I. ເງື່ອນໄຂການອຸດໜູນອອກລູກ ຫຼື ຫຼຸລູກ:

• ຖອກເງິນສົມທົບ 1 ເດືອນຂື້ນໄປ ສາມາດຝາກທ້ອງ ຫຼື ອອກລູກ ໂດຍບໍ່ເສຍຄ່າ.

1. ຖອກເງິນສົມທົບແຕ່ 6 ເດືອນຂື້ນໄປ;
2. ອອກລູກ ຫຼື ຫຼຸລູກ ຫຼັງຈາກຖືພາ 3 ເດືອນຂື້ນໄປ ຫຼື ລູກຕາຍໃນທ້ອງ ໂດຍມີການຢັ້ງຢືນດ້ານການແພດຢ່າງຖືກຕ້ອງ.

II. ອຸດໜູນອອກລູກ ຫຼື ຫຼຸລູກ (ກໍລະນີ ອອກລູກ):

1. ເງິນບຳເນັດອອກລູກ ຫຼື ຫຼຸລູກ 60% ຂອງເງິນເດືອນປະກັນຕົນສະເລ່ຍ 6 ເດືອນສຸດທ້າຍ ຕໍ່ລູກ 1 ຄົນ (ກໍລະນີລູກແຝດ ຄູນຕາມ ຈຳນວນລູກຕົວຈິງ) ຈ່າຍໃຫ້ຜູ້ປະກັນຕົນເພດຍິງ ຫຼື ເມຍຂອງຜູ້ປະກັນຕົນ ທີ່ບໍ່ໄດ້ປະກອບອາຊີບໃດໜຶ່ງ.
2. ເງິນອຸດໜູນອອກລູກ 80% ຂອງເງິນເດືອນປະກັນຕົນສະເລ່ຍ 6 ເດືອນສຸດທ້າຍ ໃນໄລຍະບໍ່ເກີນ 105ວັນ ຫຼື 3,5 ເດືອນ, ກໍລະນີເກີດລູກແຟດ ໄລຍະບໍ່ເກີນ 120ວັນ ຫຼື 4ເດືອນ.

III. ອຸດໜູນອອກລູກ ຫຼື ຫຼຸລູກ (ກໍລະນີ ຫຼຸລູກ):

1. ອາຍຸການຖືພາ 3 ເດືອນຂື້ນໄປ ຖ້າມີການຫຼຸລູກ (ລູກຕາຍໃນທ້ອງ) ຈະໄດ້ຮັບເງິນອຸດໜູນອອກລູກ ຫຼື ຫຼຸລູກ 80% ຂອງເງິນເດືອນ ປະກັນຕົນສະເລ່ຍ 6 ເດືອນສຸດທ້າຍ ຕາມຈຳນວນມື້ສັ່ງພັກຕົວຈິງຂອງແພດ ໃນໄລຍະສູງສຸດບໍ່ເກີນ 3,5ເດືອນ.

ໝາຍເຫດ: ຜູ້ປະກັນຕົນເພດຍິງ ທີ່ໄດ້ຮັບເງິນອຸດໜູນອອກລູກ ຫຼື ຫຼຸລູກ ຄົບກຳນົດແລ້ວ ຫາກສຸຂະພາບຍັງອ່ອນເພຍຢູ່ ສາມາດເຂົ້າຮັບ ການປິ່ນປົວ ແລະ ປະເມີນສຸຂະພາບຄືນ ໂດຍມີການຢັ້ງຢືນທາງການແພດ ເພື່ອຮັບອຸດໜູນປ່ວຍການ ຫຼື ເສຍອົງຄະ.

ເອກະສານປະກອບ.

• ສຳລັບພະນັກງານວິສາຫະກິດ ຫຼື ບໍລິສັດ:

1. ໃບຢັ້ງຢືນການອອກລູກ ຫຼື ຫຼຸລູກ ຈາກໂຮງໝໍ ຫຼື ຈາກອຳນາດການປົກຄອງບ້ານ ບ່ອນທີ່ເດັກເກີດ;
2. ສຳເນົາບັດປະກັນສັງຄົມ;
3. ຖ້າແມ່ນເມຍຂອງຜູ້ປະກັນຕົນໃຫ້ສຳເນົາເອກະສານໃດໜຶ່ງຄັດຕິດເປັນຕົ້ນ: ສຳມະໂນຄົວ, ທະບຽນສົມລົດ, ບົດບັນທຶກການສູ່ຂໍ ຫຼື ໜັງສືທາງການອື່ນໆ;
4. ຖ້າ​ໃຫ້ຜູ້ຕາງໜ້າ ຍື່ນແບບຂໍຮັບເງິນອຸດໜູນແທນນັ້ນຕ້ອງອັດສຳເນົາບັດປະຈຳຕົວ ຫຼື ເອກະສານ ທາງ​ການ​ໃດ​ໜຶ່ງ.

• ສຳລັບພະນັກງານລັດຖະກອນ (ຮ້ອງຂໍເງິນບຳເນັດອອກລູກ):

1. ໃບຢັ້ງຢືນການເກີດ;
2. ໃບອອກໂຮງໝໍ;
3. ສຳເນົາບັດປະຈຳຕົວ ຫຼື ສຳມະໂນຄົວ;
4. ສຳເນົາເອຕ້າເງິນເດືອນ ຫຼື ຕາຕະລາງຄິດໄລ່ເງິນເດືອນລັດຖະກອນ.