ຊອກຜູ້ເກີດສິດ

ກະລຸນາປ້ອນລະຫັດປະກັນສັງຄົມ
ເພື່ອກວດສອບສິດໃນການປິນປົວຂອງທ່ານ ແລະ ຄອບຄົວ ແລະໂຮງໝໍທີ່ທ່ານເລືອກໃນການປິ່ນປົວ

ໝາຍເຫດ
: ຂໍ້ມູນພາກລັດ ແລະ ພາກວິສະຫະກິດ ແມ່ນອັບເດດອາທິດຕໍ່ຄັ້ງ
ກະລຸນາກວດເບິ່ງວັນທີລຸ່ມນີ້:


ຂໍ້ມູນຜູ້ເກີດສິດພາກລັດອັບເດດ ຫຼ້າສຸດ ວັນທີ 12/08/2019 ເວລາ 09:45


ຂໍ້ມູນຜູ້ເກີດສິດພາກວິສະຫະກິດອັບເດດ ຫຼ້າສຸດ ວັນທີ 12/08/2019 ເວລາ 10:56

ເຂົ້າສູ່ລະບົບ



ຈຳນວນຜູ້ເຂົ້າເບິ່ງເວັບໄຊ

ປະຊາສຳພັນ


ເຊີນທ່ານຕິດຕາມລາຍການ "ປະກັນສັງຄົມ" ວັນຈັນ-ອາທິດ ເວລາ 15:30-16:00 ຄື້ນ FM 103.7 Mhz ແລະ ວັນເສົາ-ອາທິດ ເວລາ 8:00-9:00 ຄື້ນ FM 105.5 Mhz ຫຼື ຕິດຕາມຄໍລ້ຳຜ່ານໜ້າ ນສພ ປະຊາຊົນ ໄດ້ທຸກໆອາທິດສອບຖາມ: 1508 (ໂທບໍ່ເສຍຄ່າໃນໂມງການ)

ກອງປະຊຸມ ສະມາຄົມປະກັນສັງຄົມອາຊ່ຽນ (ອາຊາ) ຄັ້ງທີ່ 21 ທີ່ເມືອງມໍລະດົກໂລກ.

ໃນ​ລະ​ຫວ່າງ​ວັນ​ ທີ​ 24 - 26 ເມສາ​ 2008 ​ທີ່ຜ່ານມານີ້ ອົງ​ການ​ປະ​ກັນ​ສັງ​ຄົມ​ແຫ່ງ​ ສປ​ປ ​ລາວ​ ​ໄດ້​ຮັບ​ກຽດ​ເປັນ​ເຈົ້າ​ພາບ​​ຕາມ​ຮອບ​ວຽນຕົວອັກສອນໃນການຈັດ​ກອງ​ປະ​ຊຸມ​ສະ​ມາ​ຄົມ​ປະ​ກັນ​ສັງ​ຄົມ​ອາ​ຊ່ຽນ​ (ອາຊາ) ​ຄັ້ງ​ທີ່​ 21 ​​ທີ່​ໂຮງ​ແຮມ​ເມືອງຫຼວງ ແຂວງຫຼວງພະບາງ​, ໃຫ້ກຽດ ເປັນປະທານໄຂກອງປະຊຸມໂດຍ ທ່ານ ເລົາລີ ໄຟເພັງຢົວ ລັດຖະມົນຕີຊ່ວຍວ່າການ ກະຊວງແຮງງານ ແລະ ສະຫວັດດີການສັງຄົມ, ປະທານສະພາບໍລິຫານ ອປສ. ເຂົ້າຮ່ວມໃນກອງ​ປະ​ຊຸມ​ຄັ້ງ​ນີ້​ມີ​ຜູ້​ແທນ​ຈາກ​ 8 ​ປະ​ເທດ​ສະ​ມາ​ຊິກ​ ອາຊາ, ​ບັນ​ດາ​ຜູ້​ສັງ​ເກດ​ການ​, ​ນັກ​ບັນ​ຍາຍ​ຮັບ​ເຊີນ​ ​ແລະ ສື່ມວນຊົນຈາກບາງພາກສ່ວນເຂົ້າ​ຮ່ວມ​ທັງ​ໝົດ​ 60 ​ທ່ານ​.

ສຳລັບກອງປະຊຸມ ອາຊາ ແມ່ນໄດ້ຈັດຂຶ້ນທຸກໆປີ, ປີລະ 2ຄັ້ງ ໂດຍມີການຜັດ ປ່ຽນກັນເປັນເຈົ້າ ພາບຕາມລຳດັບຂອງໂຕອັກສອນພາສາອັງກິດ ໃນບັນດາ 8 ປະເທດສະມາຊິກ (ລາວ, ບລູໄນ, ໄທ, ສິງກະໂປ, ມາເລເຊຍ, ອິນໂດເນເຊຍ, ຫວຽດນາມ ແລະ ຟີລີປິນ) ເພື່ອປຶກສາຫາລື ກ່ຽວກັບວຽກງານປະກັນສັງຄົມ, ພ້ອມ ທັງໄດ້ສະເໜີວຽກງານ ຂອງຕົນຕໍ່ກອງປະຊຸມ ເພື່ອຖອດຖອນແລກປ່ຽນບົດຮຽນກັບ ບັນດາປະເທດສະມາຊິກດ້ວຍ​ກັນ ແລະ ພ້ອມກັນຊອກຫາວິທີແກ້ໄຂເພື່ອປັບປຸງລະບົບ ປະກັນສັງຄົມ ໃນປະເທດຂອງຕົນ ກໍຄືພາກພື້ນໃຫ້ດີຂື້ນເທື່ອລະກ້າວ. ສຳລັບປະເທດ ລາວ, ກອງປະຊຸມຄັ້ງນີ້ ເປັນຄັ້ງທີ່2 ທີ່ໄດ້ຮັບກຽດເປັນເຈົ້າພາບໃນການຈັດກອງ ປະຊຸມດັ່ງກ່າວ ເຊິ່ງຄັ້ງທີ່1 ແມ່ນຄັ້ງທີ່16 ແລະ​ ໄດ້ຈັດຂຶ້ນທີ່ ໂຮງແຮມລາວ ພຣາຊາ, ນະຄອນຫຼວງວຽງຈັນ ໃນລະຫວ່າງວັນທີ່ 29-30 ກັນຍາ 2005. ສປປ ລາວ ແມ່ນໜຶ່ງໃນສະມາຊິກ ອາຊາ ທີ່ຖືກຮັບຮອງຢ່າງ​ເປັນ​ທາງ​ການ ໃນວັນທີ່ 05 ມີຖຸນາ 2003 ​ແລະ ​ນີ້ກໍ​ແມ່ນອີກໜຶ່ງຄວາມພາກພູມໃຈ ໃນການເຕີບໃຫຍ່ຂະຫຍາຍໂຕ ຂອງອົງການປະກັນສັງຄົມ ທີ່ມີບາດກ້າວ​ໃໝ່​ໃນ​ການ​ກ້າວສູ່​ເວທີລະດັບສາກົນ.

 


ກອງ​ປະ​ຊຸມ​ສະມາຄົມປະກັນສັງຄົມອາຊ່ຽນ (ອາຊາ) ຄັ້ງທີ່21 ທີ່ ສປປ ລາວ ເປັນ ເຈົ້າພາບໄດ້​ໄຂຂຶ້ນຢ່າງເປັນທາງການ ​ໃນ​ວັນ​ທີ​ 24 ​ເມສາ​ 2008 ໂດຍໄດ້ເລີ່ມ ຈາກການ​ສຳ​ມະ​ນາ​ທາງ​ວິ​ຊາການ ເປັນ​ເວລາ​ 1ວັນ​ເຕັມ​. ການສຳມະນາດັ່ງກ່າວ ​ມີຜູ້​ຊ່ຽວຊານ​ດ້ານ​ວຽກ​ງານປະກັນ​ສັງຄົມ ຈາກ​ອົງການ​​ແຮງ​ງານ​ສາກົນ ແລະ ນັກ​ບັນ​ຍາຍ​ຮັບ​ເຊີນ​ 4ທ່ານ​ ​ຂຶ້ນ​ບັນຍາຍໃນ​ຫົວ​ຂໍ້​ “ການ​ປະກັນ​ສຸຂະພາບ​ແບບ​ທຸກ​ທົ່ວໜ້າ”.​ ໂດຍເລີ່ມຈາກ  ທ່ານ ຮິໂຣຊິ ຢາມາບານາ ​ຜູ້​ຊ່ຽວຊານ ​ດ້ານ​ວຽກ​ງານປະກັນ​ສັງຄົມ ຈາກ​ອົງການ​ແຮງ​ງານ​ສາກົນ ຂຶ້ນນຳສະເໜີກ່ຽວກັບ ບາງປະສົບການ ຂອງສາກົນ ໃນການປະຕິບັດ ດ້ານການເງິນສາທາລະນະສຸກ ເພື່ອນຳໄປສູ່ການຂະຫຍາຍຂອບ ເຂດການຄຸ້ມຄອງແບບທຸກທົ່ວໜ້າ. ຈາກນັ້ນກໍແມ່ນ ທ່ານ ດຣ ຄຳເພັດ ມະນີວົງ ວ່າການຫົວໜ້າກົມ ແຜນການ ແລະ ການເງິນ, ກະຊວງສາທາລະນະສຸກຂຶ້ນສະເໜີກ່ຽວກັບ ການປະຕິຮູບລະບົບການເງິນສາທາລະນະ ສຸກຂອງ ສປປ ລາວ ແລະ ການປຶກສາຫາລື ທີ່ເປັນກຸນແຈກ້າວເຂົ້າສູ່ ການຄຸ້ມຄອງແບບທຸກທົ່ວໜ້າ ແລະ ເພື່ອສະແດງໃຫ້ເຫັນເຖິງຄວາມ ພະຍາຍາມໃນການລິເລີ່ມລະບົບປະກັນສຸຂະພາບ ແບບທຸກທົ່ວໜ້າ. ແລະ ຕໍ່ດ້ວຍ ທ່ານ ດຣ ບົວພັດ ພົນວິໄຊ ວ່າການຫົວໜ້າພະແນກ ປະກັນສຸຂະພາບ, ຫົວໜ້າໜ່ວຍງານ ປະກັນສຸຂະພາບຊຸມຊົນ ສະເໜີກ່ຽວກັບ ການພັດທະນາລະບົບປະກັນສຸຂະພາບຊຸມຊົນໃນ ສປປ ລາວ. ແລະ ທ່ານ ດຣ ສາລີ ພົມມະວົງ ຮອງຜູ້ບໍລິຫານໂຄງການ ຍົກສູງຄຸນະພາບການບໍລິການ ສາທາລະນະສຸກ, ກະຊວງສາທາລະນະສຸກ ສະເໜີກ່ຽວກັບ ການລິເລີ່ມການປະກັນສຸຂະພາບ ເພື່ອຜູ້ທຸກຍາກ ແລະ ການປະກອບສ່ວນຂອງລະບົບດັ່ງກ່າວ ໃນການຂະຫຍາຍລະບົບ ປະກັນສຸຂະພາບ ແບບທຸກທົ່ວໜ້າ. ແລະ ສຸດທ້າຍ ທ່ານ ດຣ ຄຳສຸກ ສຸວັນນະລີ ພ້ອມຄະນະ ສະເໜີກ່ຽວກັບ ລະບົບການປ້ອງກັນທາງ ສັງຄົມ ເຊິ່ງເປັນສ່ວນໜຶ່ງຂອງຍຸດທະສາດ ໃນການປັບປຸງການເຂົ້າຮັບການບໍລິການປິ່ນປົວສຸຂະພາບ ໂດຍເນັ້ນບາງບົດຮຽນທີ່ສຳຄັນໃນການ ຈັດຕັ້ງປະຕິບັດທີ່ແຂວງວຽງຈັນ. ຜ່ານການບັນຍາຍເຫັນວ່າ ແຕ່ລະຫົວຂໍ້ ທີ່ນຳສະເໜີນັ້ນ ລ້ວນແຕ່ໄດ້ຮັບຄວາມ​ສົນ​ໃຈ, ມີ​ການຕັ້ງ​ບັນຫາ​ຖາມ ​ແລະ ​ສົນທະນາຜັດປ່ຽນ​ກັນ​ແລກປ່ຽນ​ຄວາມ​ຄິດ​ເຫັນ ພ້ອມ​ທັງ​ການ​ມີຄຳ​ແນະ​ນຳ​ທີ່​ເປັນ​ປະ​ໂຫຍ​ດ​ ໃນ​ການ​ພັດທະນາ​ລະບົບ​ປະກັນ​ສັງຄົມ​ໃນ ສປປ ລາວ ກໍ​ຄື​ ໃນ​ພາກ​ພື້ນ​ໃຫ້​ດີ​ຂຶ້ນ. ແລະ​ ໃນຕອນຄ່ຳຂອງ​ມື້​ດຽວ​ກັນ ກໍແມ່ນບັນຍາກາດຂອງງານລ້ຽງຕ້ອນຮັບ, ຈັດຂຶ້ນທີ່ໂຮງແຮມພູສີ ທ່າມກາງບັນຍາກາດ ແຫ່ງໄມຕີ ຈິດມິດຕະພາບອັນອົບອຸ່ນ ແລະ ເປັນການຕ້ອນຮັບຢ່າງຈິງໃຈຈາກ​ໃຈເຈົ້າພາບ ກໍຄືອົງ​ການ​ປະ​ກັນ​ສັງ​ຄົມ ​ພ້ອມທັງຊາວຫຼວງພະບາງ ອັນ​ໄດ້​ສ້າງ​ຄວາມ​ປະ​ທັບ ​ໃຈ​ແກ່​ແຂກ​ທີ່​ເຂົ້າ​ຮ່ວມ​ຢ່າງ​ໜ້າ​ເພິ່ງ​ພໍ​ໃຈ.


ວັນທີ່ 25 ເມສາ 2008 ​​​​ກອງ​ປະ​ຊຸມ​ສະ​ພາ​ບໍ​ລິ​ຫານ​ ອາຊາ ​ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ ​ແລະ​​​ ໄດ້ເຂົ້າ​ຮ່ວມສະ​ເພາະ​ແຕ່​ບັນດາສະມາຊິກ ອາຊາ ​ເທົ່າ​ນັ້ນ. ​ໃນ​ນັ້ນມີ​ຕົວ​ແທນ​ຈາກ​ 5ປະເທດ​ ​ຂອງ ອົງການປະ​ກັນ​ສັງ​ຄົມ ​ທີ່​ເປັນ​ສະ​ມາ​ຊິກ​ ອາຊາ​ຂຶ້ນນຳ ສະເໜີບົດຮຽນທີ່ດີຂອງອົງການຕົນເອງຕໍ່ກອງປະຊຸມ ເພື່ອແລກປ່ຽນບົດຮຽນເຊິ່ງກັນ ແລະ ກັນ ໂດຍເລີ່ມຈາກ ອົງການ​ປະກັນ​ສັງຄົມ ​ຈາກ​ປະເທດ ອິນ​ໂດ​ເນ​ເຊຍ​ ​ໄດ້​ນຳ​ສະ​ເໜີ​ກ່ຽວ​ກັບ ການ​ບໍລິຫານ​ຄຸ້ມ​ຄອງທີ່​ດີ​ ພາຍ​ໃນ​ອົງການ​ປະກັນ​ສັງຄົມ, ແລະ ຕໍ່ດ້ວຍອົງການ​ປະກັນ​ສັງຄົມ ​ຈາກປະເທດບຣູໄນ ​​ນຳ​ສະ​ເໜີ​ກ່ຽວ​ກັບ​ ການ​ສຶກສາ​ໃຫ້​ຄວາມ​ຮູ້​ ແກ່​ສາທາລະນະ ​ໂດຍ​ຜ່ານ​ການ​ປະຊາສຳພັນ​ ດ້ານ​ການວາງ​ແຜນ​ທາງ​ດ້ານ​ການ​ເງິນ ​ແລະ ​ຄວາມ​ຮັບ​ຮູ້​ກ່ຽວ​ກັບ​ລະບຽບ​ກົດໝາຍ, ຫຼັງຈາກນັ້ນກໍແມ່ນສຳນັກງານ ອົງການປະກັນສັງຄົມ ແຫ່ງປະເທດ ໄທ ​ນຳ​ສະ​ເໜີ​ກ່ຽວ​ກັບ​ ການ​ພັດທະນາ​ລະບົບ​ສາຍ​ດ່ວນ 1506, ຕາມ​ດ້ວຍ ອົງການປະກັນສັງຄົມ ຂອງ​ມາ​ເລ​ເຊຍ ​ນຳ​ສະ​ເໜີ​ກ່ຽວ​ກັບ​ ການຈັດ​ຕັ້ງ​ປະຕິບັດ​ ການ​ຄຸ້ມ​ຄອງ​ຄວາມ​ສ່ຽງ​ ໃນ​ລະບົບ​ປະກັນ​ສັງຄົມ ​ແລະ ປິດ​ທ້າຍ​ດ້ວຍ ອົງການ​ປະກັນ​ສັງຄົມ ​ແຫ່ງປະເທດລາວ ​ນຳ​ສະ​ເໜີ​ກ່ຽວ​ກັບການ​ຈ່າຍ​ເງິນ​ມອບ​ເໝົາ ​​ໃຫ້​ແກ່​ໂຮງໝໍ​ຄູ່​ສັນຍາ​ໃນ ສປປ ລາວ. ​ຈາກ​ນັ້ນ ທ່ານນາງ ລໍ​ນາ ໂອ​ ຟາ​ຈາ​ໂດ (Lorna O Fajardo) ວ່າການ​ປະທານ ອົງການ​ປະກັນ​ສຸຂະພາບ ​ແຫ່ງ​ຟີ​ລີ​ປິນ, ປະທານ ອາຊາ​ ​ໄດ້​ກ່າວ​ເປີດ​ກອງ​ປະ​ຊຸມ ​ສະ​ພາ​ບໍ​ລິຫານ​ຢ່າງ​ເປັນ​ທາງ​ການ​ ​​​ແລະ​ ຜ່ານ​ບົດ​ລາຍ​ງານ​ ຂອງ​ກອງ​ປະຊຸມ​ຄັ້ງ​ທີ່ 20 ທີ່​ປະ​ເທດ ຟີ​ລີ​ປິນ. ຈຸດປະສົງ​ຫຼັກໆ ຂອງ​ກອງ​ປະ​ຊຸມ​ໃນ​ຄັ້ງ​ນີ້​ ແມ່ນ​​ເພື່ອປຶກສາ​ຫາລື ​ແລະ ​ແລກປ່ຽນບົດຮຽນ ດ້ານວຽກງານປະກັນ​ສັງຄົມ​ນຳ​ກັນ ໂດຍ​ສະ​ເພາະ​ແມ່ນ​ກັບ​ບັນດາ​ປະ​ເທດ​ໃນ​ອາ​ຊ່ຽນ.​ ​​ນອກ ຈາກ​ນັ້ນ, ກໍ​ຍັງ​ໄດ້​ປຶກສາ​ຫາ​ລືກ່ຽວກັບ​ ຄວາມ​ພະຍາຍາມ​ໃນ​ການ​ເຊື້ອ​ເຊີນ​​ເອົາ​ປະ​ເທດ ກຳປູ​ເຈ່ຍ ​ແລະ​ ພະມ້າ ​ເຂົ້າ​ຮ່ວມ​ ເປັນ​ສະມາຊິກ​ ອາຊາ ໃນ​ປີຕໍ່​ໄປ​ ແລະ ກອງ​ປະຊຸມ​ຍັງ​ໄດ້​ສະ​ເໜີຮ່າງ​ຖະ​ແຫຼງ​ການ​ຂອງ​ ອາຊາ ກ່ຽວ​ກັບ​ ບັນຫາ​ການ​ຫວ່າງ​ງານ, ​ແກ້​ໄຂ​ຄວາມທຸກ​ຍາກ ແລະ ​ຄວາມ​ພະຍາຍາມ​ໃນ​ການ​ສະໜອງ​ການ​ປະກັນ​ສັງຄົມ​ໃຫ້​ກັບ​ຜູ້​ອອກ​ແຮງ​ງານ​ຢູ່​ ຕ່າງປະ​ເທດ ​ແລະ ​ແຮງ​ງານ​ຕ່າງ​ດ້າວ ໂດຍ​ສະ​ເພາະ​ແມ່​ນຢູ່ໃນ​ຂອບເຂດພາກ ​ພື້ນ​ອາ​ຊ່ຽນ ​ເຊິ່ງ​ແຕ່ລະ​ປະ​ເທດ​ກໍ​ໄດ້​ຮັບ​ເອົາການສະເໜີດັ່ງກ່າວໄປ​ພິຈາລະນາຄົ້ນຄວ້າ ​ເພາະ​ບັນຫາ​ດັ່ງກ່າວ ​ແມ່​ນຢູ່​ເໜືອ​ຄວາມ​ຮັບຜິດຊອບ​ໃນ​ການ​ຕັດສິນໃຈ​ຂອງ​ ອົງການ​ປະກັນ​ສັງຄົມ​ຂອງ​ແຕ່ລະ​ປະ​ເທດ. ​ແລະ ໃນຕອນຄ່ຳຂອງມື້ດຽວກັນ ກໍ​ໄດ້​ມີງານລ້ຽງ ອຳລາທີ່ໂຮງແຮມ The Grand ພາຍໃຕ້ການເປັນ ປະທານຂອງ ທ່ານ ຄຳພວງ ອິນທະແສງ ຜູ້ອຳນວຍການ ອົງການປະກັນສັງຄົມແຫ່ງ ສປປ ລາວ. ​​ງານລ້ຽງ​ດັ່ງກ່າວ​ໄດ້​ຖືກ​ຈັດ​ ແລະ ຕົບແຕ່ງຂຶ້ນ​ແບບອົບອຸ່ນ, ເປັນກັນເອງແບບຄອບຄົວ ກັບອາຫານຫຼາກລົດທີ່ພິເສດສຳລັບງານ ລ້ຽງ​ໃນ​ຄ່ຳ​ຄືນ​ນັ້ນ ປະສານກັບກິ່ນຫອມຂອງດອກຈຳປາຈາກສວນທີ່ໂຊຍພັດ​ມາ​ຕາມ ​ສາຍ​ລົມ ກົມ​ກືນເຂົ້າກັບບັນຍາກາດຍາມລາຕີຢ່າງລົງໂຕ. ນອກຈາກ​​ນັ້ນ, ແຂກ​ທີ່​ເຂົ້າ​ຮ່ວມ​ ຍັງ​ໄດ້​ສຳ​ຜັດ​ກັບ​ການ​ສະ​ແດງ​ສິລະ​ປະທັງ​ ບົດ​ເພງ​ ​​ແລະ ບົດ​ຟ້ອນ ອັນ​ງົດ​ງາມ​ຕ່າງໆ ທີ່​ເປັນ​ເອ​ກະ​ລັກ​ທາງ​ດ້ານ​ວັດ​ທະ​ນະ​ທຳ​ຂອງ​ລາວ,​ ແລະ ຕາມດ້ວຍການມອບເຄື່ອງທີ່ລະນຶກ​ໃຫ້ກັນ ແລະ ກັນໃນບັນດາປະເທດສະມາຊິກ ອາຊາ. ປິດທ້າຍດ້ວຍ ບັນຍາກາດທີ່ພິເສດສຸດຂອງງານ ກໍຄືການ​ຟ້ອນ​ລຳ​ວົງ​ລາວ​​ຮ່ວມກັນກັບບັນດາຜູ້ແທນ ​​ແລະ ​ແຂກ​ທີ່​ເຂົ້າ​ຮ່ວມຢ່າງ​ມ່ວນ​ຊື່ນ​.


ໃນ​ວັນທີ່​ 26 ເມສາ​ 2008 ​​ແມ່ນ​ມື້​ທ່ຽວ​ຊົມ​ສະ​ຖານ​ທີ່​ສຳ​ຄັນ ​ທາງ​ປະ​ຫວັດ​ສາດ​, ​​ຄວາມ​ອຸດົມຮັ່ງມີ ​ທາງ​ດ້ານທຳ​ມະ​ຊາດ​ ແລະ ວັດ​ທະ​ນະ​ທຳຂອງ ແຂວງຫຼວງພະບາງ ໂດຍເລີ່ມຕົ້ນຈາກ​ ການຢ້ຽມຊົມ ວັດຊຽງທອງ ສະຖານທີ່ເກົ່າແກ່ທາງປະຫວັດສາດ ແລະ ຕໍ່ດ້ວຍການລ່ອງເຮືອຕາມລຳນ້ຳຂອງອັນກວ້າງໃຫຍ່ໄປຖ້ຳຕິ່ງ ໃຊ້ເວລາ​ເດີນ ທາງເກືອບ 2ຊົ່ວໂມງ, ​ແຕ່​ໄລຍະ​ເວລາ​ກໍບໍ່ໄດ້ເປັນອຸປະສັກ ແກ່ການເດີນທາງຂອງບັນ ດາຜູ້ແທນ ເພາະຕະຫຼອດໄລຍະຂອງການລ່ອງເຮືອ ແມ່ນໄດ້ຊົມຄວາມສວຍງາມຂອງ ທຳມະຊາດຕາມສອງຝັ່ງຂອງ, ຝູງນົກທີ່ບິນເຈີດໄປຕາມລຳນ້ຳ ແລະ ​ສຳຜັດກັບ ອາກາດອັນບໍລິສຸດ ທີ່​ຫາ​ບໍ່​ຄ່ອຍ​ໄດ້​ໃນ​ບ້ານ​ຂອງເຂົາ​ເຈົ້າ​​ ແຕ່ກ່ອນຈະຮອດຖ້ຳ ຂະ​ບວນ​ເຮືອໄດ້ແວ່ ບ້ານສ້າງໄຫ ທີ່ເອີ້ນໄດ້ວ່າເປັນບ້ານຫັດຖະກຳ, ມີການຕົ້ມເຫຼົ້າ ອັນມີລົດຊາດທີ່ເປັນເອກະລັກ ແລະ ມີການສານ​ຫຸ້ມແກ້ວເຫຼົ້າດ້ວຍໄມ້ໄຜ່ ອັນຫຼາກຫຼາຍລວດ ລາຍທີ່ງົດງາມ ແລະ ເປັນເອກະລັກ ຂອງບ້ານດັ່ງກ່າວ. ແລະ ສະຖານ​ທີ່​ສຸດ​ທ້າຍຂອງ​ການ​ຢ້ຽມຢາມ ກໍແມ່ນບ້ານຜານົມ​​​ເຊິ່ງເປັນບ້ານຫັດຖະກຳອີກບ້ານໜຶ່ງ, ຈຳໜ່າຍຜະລິດ​ຕະພັນ​ທີ່​ເຮັດ​ຈາກ​ສີມື​ຂອງເຂົາເຈົ້າ ​ເຊັ່ນ ຜ້າບ່ຽງ, ສິ້ນ, ຜ້າປູໂຕະ, ຜ້າໂຊຝາ ແລະ ຜະລິດຕະພັນອື່ນໆ ທີ່ເຮັດຈາກໄໝອັນມີ​ຄວາມສວຍ​ງາມ ​ແລະ ​ປານີດທີ່​ສາມາດ​ເອົາ​ຊະນະ​ໃຈ​ຜູ້​ແທນ​ ຈົນຈົກກະເປົາຊື້ຜະລິດຕະພັນຂອງເຂົາເຈົ້າກັບບ້ານ ເປັນເຄື່ອງທີ່ລະນຶກ. ສິ່ງດັ່ງກ່າວຖື​ວ່າ​ ເປັນຄວາມເອກອ້າງທະນົງໃຈຂອງຊາວຫຼວງພະບາງ ກໍຄືຄົນລາວທົ່ວປະເທດ ທີ່ມີໂອກາດໄດ້ຕ້ອນຮັບແຂກຕ່າງ ປະເທດ, ໄດ້ເຜີຍແຜ່ ວັດທະນາທຳ, ຄວາມສວຍງາມຂອງເມືອງມໍລະດົກໂລກ ແລະ ນ້້ຳໃຈອັນໂອບເອື້ອອາລີ ໃຫ້ເຂົາເຈົ້າໄດ້ຮັບຮູ້. ພວກເຮົາເຊື່ອ ແລະ ຫວັງຢ່າງຍິ່ງວ່າ ເຂົາເຈົ້າຕ້ອງເກັບເອົາສິ່ງທີ່ເຂົາໄດ້ສຳຜັດ ແລະ ພົບພໍ້ເຫຼົ່ານັ້ນ ກັບໄປບອກໝູ່ເພື່ອນ ແລະ ຍາດຕິພີ່ນ້ອງຂອງເຂົາເຈົ້າ ແລະ ກັບມາຢ້ຽມຢາມເມືອງ ມໍລະດົກໂລກ, ປະເທດລາວອີກຄັ້ງຢ່າງ​ແນ່ນອນ. ສຳລັບກອງ​ປະ​ຊຸມ​ຄັ້ງ​ຕໍ່​ໄປ​ ຈະ​ຈັດ​ຂຶ້ນ​ຢູ່​ທີ່​ປະ​ເທດ​ສິງກະໂປ ​ໃນ​ລະຫວ່າງ​ວັນ​ທີ່ 22-24 ຕຸລາ 2008 ທີ່​ຈະ ​ມາ​ເຖິງ​ນີ້.

div#mb_center,div#mb_bottom{ z - index: 9999; } div#mb_overlay{ z - index: 9999; }