ໃນວັນທີ 28 ມີນາ 2024 ທີ່ ໂຮງແຮມ ຈຳປາສັກແກຣນ, ອົງການປະກັນສັງຄົມແຫ່ງຊາດ (ອປຊ) ໄດ້ຈັດກອງປະຊຸມທາບທາມ ຄຳເຫັນຕໍ່ຮ່າງເນື້ອໃນກົດໝາຍ ວ່າດ້ວຍການປະກັນສັງຄົມ (ສະບັບປັບປຸງ) ຢູ່ ແຂວງຈຳປາສັກ, ໂດຍການສະໜັບສະໜູນ ຂອງອົງການ UNDESA. ກອງປະຊຸມດັ່ງກ່າວ ໄດ້ຮັບກຽດເປັນປະທານຮ່ວມຂອງ ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ ແລະ ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທັງເປັນຫົວໜ້າຄະນະຊີ້ນໍາລວມການປັບປຸງກົດໝາຍ, ໃຫ້ກຽດເຂົ້າຮ່ວມມີ ຫົວໜ້າກົມສັງຄົມ (ສະພາແຫ່ງຊາດ), ຮອງຫົວໜ້າກົມກົດໝາຍ (ກະຊວງຍຸຕິທຳ), ຮອງຫົວໜ້າກົມນິຕິກຳ (ຫ້ອງວ່າການສຳນັກງານນາຍົກລັດຖະມົນຕີ), ຮອງຫົວໜ້າອົງການປະກັນສັງຄົມແຫ່ງຊາດ, ມີບັນດາປະທານ-ຮອງປະທານສະພາປະຊາຊົນແຂວງ 5 ແຂວງພາກໃຕ້, ມີຫົວໜ້າພະແນກ-ຮອງພະແນກ ຮສສ ແຂວງ, ພະແນກສາທາແຂວງ, ຄະນະອຳນວຍການໂຮງໝໍແຂວງ ແລະ ຜູ້ຕາງໜ້າຈາກພາກສ່ວນຫ້ອງການຂອງລັດ ແລະ ວິສາຫະກິດພາຍໃນແຂວງຈຳປາສັກ, ລວມທັງໝົດ 100 ກວ່າທ່ານ.

 

ໃນກອງປະຊຸມ ໄດ້ຮັບຟັງການນໍາສະເໜີໂດຍຫຍໍ້ ກ່ຽວກັບເນື້້ອໃນກົດໝາຍວ່າດ້ວຍການປະກັນສັງຄົມ (ສະບັບປັບປຸງ) ໂດຍ ທ່ານ ທອງພັນ ໄຊຍະລາດ ຮອງຫົວໜ້າອົງການປະກັນສັງຄົມແຫ່ງຊາດ ທັງເປັນຮອງຫົວໜ້າ ຄະນະວິຊາການປັບປຸງກົດໝາຍ, ຊຶ່ງທ່ານໄດ້ສະແດງໃຫ້ເຫັນເຖິງເນື້ອໃນກົດໝາຍທີ່ອາດຈະໄດ້ມີການປັບປຸງ ພ້ອມທັງຊີ້ແຈງກ່ຽວກັບຄວາມຈໍາເປັນຂອງການປັບປຸງບາງເນື້ອໃນ ແລະ ຂໍ້ກໍານົດໃນກົດໝາຍ ເພື່ອໃຫ້ສອດຄ່ອງ ແລະ ເໝາະສົມ ກັບສະພາບການຂະຫຍາຍຕົວຂອງເສດຖະກິດ-ສັງຄົມໃນປັດຈຸບັນ. ກອງປະຊຸມ ໄດ້ມີການປະກອບຄໍາຄິດເຫັນໃສ່ຮ່າງເນື້ອໃນກົດໝາຍ ຢ່າງກົງໄປກົງມາ ແລະ ດ້ວຍຄວາມຮັບຜິດຊອບສູງ, ພ້ອມທັງຮັບເອົາບັນດາຂໍ້ສະເໜີຂອງບັນດາຜູ້ແທນ ເພື່ອປະກອບເຂົ້າໃນການຄົ້ນຄວ້າ ປັບປຸງ ຮ່າງກົດໝາຍ ແລະ ວຽກງານດ້ານວິຊານການ ເວົ້າລວມ ເວົ້າສະເພາະ ກໍ່ຄື ການໃຫ້ບໍລິການ ແລະ ຂອດປະສານງານຂອງປະກັນສັງຄົມ ແລະ ໂຮງໝໍ ໃຫ້ນັບມື້ນັບເປັນທີ່ເພິ່ງພໍໃຈແກ່ສັງຄົມຍິ່ງຂື້ນ.

 

ໃນຕອນທ້າຍ, ປະທານກອງປະຊຸມ ໄດ້ຕີລາຄາສູງຕໍ່ຄຳຖາມເຈາະຈິີ້ມ ແລະ ການປະກອບຄໍາຄິດເຫັນຂອງບັນດາຜູ້ແທນ ເຂົ້າໃນຮ່າງກົດໝາຍ, ພ້ອມກັນນັ້ນ ທ່ານໄດ້ກ່າວຕື່ມອີກວ່າ: ການປະກັນສັງຄົມ ເເມ່ນເປັນວຽກງານໜຶ່ງທີ່ຂື້ນກັບກະຊວງແຮງງານ ແລະ ສະຫວັດດີການສັງຄົມ ຊຶ່ງເປັນແນວທາງນະໂຍບາຍຂອງພັກ-ລັດຖະບານ ເປັນອົງກອນທີ່ບໍ່ໄດ້ຫວັງຜົນກໍາໄລ, ເປັນລະບົບທີ່ມີການສະເລ່ຍຄວາມສ່ຽງ ແລະ ຊ່ວຍເຫຼືອເຊິ່ງກັນແລະກັນພາຍໃນສັງຄົມ ສະແດງອອກຈາກການປິ່ນປົວສຸຂະພາບ ຄົນທີ່ແຂງແຮງ ຊ່ວຍເຫຼືອຄົນທີ່ເຈັບປ່ວຍ, ຄ້ຳປະກັນສິດຜົນປະໂຫຍດຂັ້ນພື້ນຖານໃນການດໍາລົງຊີວິດແກ່ກຸ່ມເປົ້າໝາຍທັງພາກລັດ, ພາກວິສາຫະກິດ ແລະ ພາກສະໝັກໃຈ ດ້ວຍການສະໜອງອຸດໜູນຕ່າງໆ ເຊັ່ນ: ການປະກັນສຸຂະພາບ, ອຸດໜູນອຸປະຕິເຫດແຮງງານ, ອອກລູກ, ປ່ວຍການ, ເສຍກໍາລັງແຮງງານ, ບໍານານ, ເສຍຊີວິດ, ອຸດໜູນສະມາຊິກຄອບຄົວ ແລະ ອຸດໜູນວ່າງງານ ສໍາລັບຫົວໜ່ວຍວິສາຫະກິດ. ນອກນັ້ນ ປະທານ ຍັງໄດ້ຮຽກຮ້ອງໃຫ້ບັນດາຜຸ້ແທນ ຈົ່ງພ້ອມກັນເອົາໃຈໃສ່ຄົ້ນຄ້ວາບັນດານິຕິກໍາ, ກົດໝາຍປະກັນສັງຄົມ ແລະ ລະບຽບການຕ່າງໆທີ່ກ່ຽວຂ້ອງ ເພື່ອຮັບປະກັນສິດຜົນປະໂຫຍດໃຫ້ແກ່ ພະນັກງານ-ລັດຖະກອນ, ທະຫານ-ຕຳຫຼວດ, ພະນັກງານວິສາຫະກິດ, ຄົນຕ່າງປະເທດທີ່ມາອອກແຮງງານຢູ່ລາວ ແລະ ຜູ້ສະໝັກໃຈ ໃຫ້ຮັບຮູ້ ແລະ ເຂົ້າໃຈ ວຽກງານດັ່ງກ່າວຫຼາຍຂື້ນ.