ເພື່ອເປັນການແລກປ່ຽນ ແລະ ຖອດຖອນບົດຮຽນທີ່ດີ ຂອງ ວຽກງານປະກັນສັງຄົມ 02 ປະເທດ ຄື ປະກັນສັງຄົມອິນໂດເນເຊຍ ແລະ ປະກັນສັງຄົມລາວ ພາຍໃຕ້ຫົວຂໍ້ “ການສົ່ງເສີມການຈັດຕັ້ງປະຕິບັດວຽກງານ ການປົກປ້ອງທາງສັງຄົມແບບຍືນຍົງ ສໍາລັບຜູ້ອອກແຮງງານ ແລະ ຄອບຄົວຂອງເຂົາເຈົ້າ ໃນ ອາຊຽນ” ໂດຍສະເພາະການຖອດຖອນບົດຮຽນການຈັດຕັ້ງປະຕິບັດວຽກງານປະກັນສັງຄົມໃນຄັ້ງນີ້ ແມ່ນເພື່ອນຳມາປັບປຸງການບໍລິການວຽກງານປະກັນສັງຄົມ ແຫ່ງຊາດໃຫ້ດີຂື້ນໂດຍສະເພາະໃຫ້ສາມາດຂະຫຍາຍອັດຕາການປົກຄູມສູ່ແຮງງານນອກລະບົບໃຫ້ກ້ວາງຂວາງ ແລະ ເພື່ອເປັນຂໍ້ມູນໃຫ້ແກ່ການປັບປຸງ ກົດໝາຍວ່າດ້ວຍປະກັນສັງຄົມໃຫ້ມີຄວາມສອດຄ່ອງ ແລະ ຮັດກຸມຂື້ນກ່ວາເກົ່າ. ການແລກປ່ຽນບົດຮຽນໃນຄັ້ງນີ້ ຈັດຂື້ນໃນລະຫວ່າງວັນທີ 20-24 ສິງຫາ 2023 ທີ່ ນະຄອນຫຼວງ ຈາກາຕາ ປະເທດອິນໂດເນເຊຍ ຊຶ່ງໄດ້ຮັບການສະໜັບສະໜູນຈາກ ອົງການແຮງງານສາກົນ ILO/Korea partnership Program. ຕາງໜ້າຝ່າຍລາວໃຫ້ກຽດນໍາໂດຍ ທ່ານ ນາງ ບົວຫອມ ພົມມະຈັນ ຮອງຫົວໜ້າອົງການປະກັນສັງຄົມແຫ່ງຊາດ ພ້ອມດ້ວຍຄະນະ, ມີຜູ້ຕາງໜ້າຈາກອົງການແຮງງານສາກົນປະຈໍາລາວ, ສູນກາງສະຫະພັນກໍາມະບານລາວ, ອົງການ Oxfam ແລະ ໃຫ້ກຽດກ່າວຕ້ອນຮັບໂດຍ ທ່ານ Pramudya Iriawan Buntoro ຜູ້ອໍານວຍການ ອົງການປະກັນສັງຄົມອິນໂດເນເຊຍ BPJS Ketenagakerjaan ພ້ອມດ້ວຍຄະນະ.

 

ການທັດສະນະຄັ້ງນີ້ ຝ່າຍລາວໄດ້ມີການນໍາສະເໜີ ການຈັດຕັ້ງປະຕິບັດວຽກງານປະກັນສັງຄົມ ໃນ ສປປ ລາວ ເພື່ອເປັນຂໍ້ມູນໃນການແລກປ່ຽນບົດຮຽນໂດຍທ່ານ ນາງ ບົວຫອມ ພົມມະຈັນ ຮອງຫົວໜ້າອົງການປະກັນສັງຄົມແຫ່ງຊາດ ແລະ ທ່ານ ນາງ Loveleen De ຜູ້ບໍລິຫານໂຄງການ ອົງການແຮງງານສາກົນປະຈໍາລາວ, ຕາງໜ້າຈາກບັນດາກົມຂອງ ອົງການປະກັນສັງຄົມອິນໂດເນເຊຍ ໄດ້ສະເໜີບົດຮຽນຈາກການຈັດຕັ້ງປະຕິບັດນະໂຍບາຍປະກັນສັງຄົມ ຕໍ່ ຜູ້ອອກແຮງງານໃນຫົວໜ່ວຍແຮງງານ ແລະ ແຮງງານນອກລະບົບຫຼາຍຫົວຂໍ້ ໂດຍສະເພາະແມ່ນ: ການຈັດຕັ້ງປະຕິບັດ ນະໂຍບາຍປະກັນສັງຄົມ, ການຂະຫຍາຍອັດຕາການປົກຄຸມດ້ານປະກັນສັງຄົມ ທັງແຮງງານໃນລະບົບ ແລະ ແຮງງານນອກລະບົບ, ການໃຫ້ບໍລິການ ດ້ານປະກັນສັງຄົມແບບຄົບວົງຈອນ ດ້ວຍ Online Application, ການຫັນປ່ຽນລະບົບ ໂດຍນໍາໃຊ້ເຕັກໂນໂລຍີ ດິຈິຕອນ 4.0 ເຂົ້າໃນການບໍລິຫານຄຸ້ມຄອງ, ການສື່ສານ ແລະ ການໂຄສະນາປະຊາສຳພັນ, ບໍລິຫານຈັດການ- ຄຸ້ມຄອງລະບົບຖານຂໍ້ມູນປະກັນສັງຄົມ, ການປະຕິບັດອຸດໜູນການວ່າງງານ ແລະ ອຸດໜູນອື່ນໆ.