ຕອນເຊົ້າວັນທີ 9/6/2023 ຢູ່ທີ່ ອົງການປະກັນສັງຄົມແຫ່ງຊາດ ໄດ້ຈັດໃຫ້ມີກອງປະຊຸມເຜີຍແຜ່ປະກັນສັງຄົມໃຫ້ກັບຕາງໜ້າ ກົມຈັດຕັ້ງ-ພະນັກງານ ຈາກ 18 ກະຊວງ ແລະ ໜ່ວຍງານປະກັນສຸຂະພາບ ຈາກ 4 ໂຮງໝໍສູນກາງ, ພ້ອມກັບພະນັກງານຫຼັກແຫຼ່ງອົງການປະກັນສັງຄົມແຫ່ງຊາດ ເຂົ້າຮ່ວມຢ່າງພ້ອມພຽງ ຈໍານວນ 60 ກ່ວາຄົນ.

 

ໃຫ້ກຽດເຂົ້າຮ່ວມເປັນປະທານກອງປະຊຸມ ກ່າວເປີດໂດຍ ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ, ເພິ່ນໄດ້ກ່າວວ່າ: ກອງປະຊຸມທີ່ມີຄວາມໝາຍໃນຄັ້ງນີ້ຈັດຂຶ້ນກໍເພື່ອເປັນເວທີ ປຶກສາຫາລືໃນການ ຈັດຕັ້ງກົດໝາຍປະກັນສັງຄົມໃນໄລຍະຜ່ານມາ ແນໃສ່ສ້າງຄວາມເຂົ້າໃຈເພີ່ມໃຫ້ກັບບັນດາພະນັກງານລັດຖະກອນ ທີ່ເປັນຕົວແທນມາຈາກ ກົມຈັດຕັ້ງ-ພະນັກງານ ກະຊວງຕ່າງໆ ພ້ອມຫວັງວ່າບັນດາຜູ້ເຂົ້າຮ່ວມໃຫ້ນໍາເອົາເນື້ອໃນ ຈິດໃຈທີ່ປະຊຸມເປັນກະບອກສຽງສົ່ງຂໍ້ມູນດັ່ງກ່າວນີ້ໄປຕໍ່ເຖິງກົມກອງຂອງຕົນທີ່ສັງກັດໃຫ້ເຂົ້າໃຈເຖິງຄວາມໝາຍຄວາມສຳຄັນຄັນຂອງລະບົບປະກັນສັງຄົມ.

 

ໃນທີ່ປະຊຸມໄດ້ຮັບຟັງການເຜີຍແຜ່ກົດໝາຍວ່າດ້ວຍການປະກັນສັງຄົມ ຈາກ ທ່ານ ນາງ ດວງເດືອນ ຈັນທະວົງ, ຫົວໜ້າ ພະແນກໂຄສະນາ ປະຊາສຳພັນ, ໄດ້ນຳສະເໜີກ່ຽວກັບ ປະຫວັດຄວາມເປັນມາຂອງລະບົບປະກັນສັງຄົມ, ຂັ້ນຕອນການຂຶ້ນທະບຽນເປັນສະມາຊິກປະກັນສັງຄົມຂອງພະນັກງານລັດຖະກອນ, ສິດຜົນປະໂຫຍດຕ່າງໆ ທີ່ລະບົບປະກັນສັງຄົມຄຸ້ມຄອງຄື: ອຸດໜູນອຸບັດເຫດແຮງງານ, ອຸດໜູນປະກັນສຸຂະພາບ,ອຸດໜູນເກີດລູກ, ອຸດໜູນປ່ວຍການ, ອຸດໜູນເສຍກໍາລັງແຮງງານ, ອຸດໜູນບຳນານ, ອຸດໜູນເສຍຊີວິດ ແລະ ອຸດໜູນສະມາຊິກຄອມຄົວ. ເພື່ອເປັນການສ້າງຄວາມເຂົ້າໃຈໃຫ້ແກ່ຜູ້ຮັບຜິດຊອບວຽກບຸກຄະລາກອນຂອງແຕ່ລະກະຊວງໄດ້ຮັບຮູ້ ແລະ ນຳໄປເຜີຍແຜ່ຕໍ່ໃຫ້ພະນັກງານລັດຖະກອນພາຍໃນ ກັບກົມກອງຂອງເຂົາເຈົ້າເປັນການປ້ອງການການເສຍສີດ ພ້ອມທັງເປັນການອັບເດດກົດໝາຍແລະຄຳແນະນຳຕ່າງໆຢ່າງລະອຽດຈະແຈ້ງ.

 

ຈາກນັ້ນ, ທ່ານນາງ ແຕ ເພັງລາວັນ, ຫົວໜ້າພະແນກອຸດໜູນ, ອົງການປະກັນສັງຄົມແຫ່ງຊາດ ໄດ້ຂຶ້ນນໍາສະເໜີ ຂັ້ນຕອນການຮັບອຸດໜູນ ແລະ ການປະກອບເອກະສານຕ່າງໆໃນການຂໍຮັບອຸດໜູນ. ເພື່ອປ້ອງກັນການເສຍສິດ ຂອງຜູ້ປະກັນຕົນ ຮັບປະກັນຄວາມຖືກຕ້ອງ ແລະ ວ່ອງໄວກັບຄວາມຕ້ອງການຂອງຜູ້ປະກັນຕົນນັ້ນເອງ.

 

ພາຍຫຼັງຮັບຟັງການນຳສະເໜີ ບັນດາຜູ້ເຂົ້າຮ່ວມກໍໄດ້ຕັງຄຳຖາມເຈາະຈິ້ມຫຼາຍບັນຫາເຊິ່ງສ່ວນຫຼາຍແມ່ນຕິດພັນກັບວຽກງານປະກັນສຸຂະພາບ ກໍລະນີເຈັບສຸກເສີນຈ່າຍເງິນກ່ອນ, ກໍລະນີໜ່ວຍງານຕີເປີເຊັນເສຍອົງຄະ, ຂັ້ນຕອນການຂໍຮັບເງິນອຸດໜູນຕ່າງໆ ເຊິ່ງ ຕາງໜ້າຈາກກະຊວງສາທາລະນະສຸກຄື: ຫາກຄົນເຈັບໄປປິ່ນປົວສຸກເສີນທີ່ໂຮງໝໍບໍ່ໄດ້ເລືອກສາມາດແຈ້ງກ່ອນພາຍໃນ 3 ວັນ ແລະ ໄປຖອນເງິນຄືນທີ່ໂຮງໝໍຕົນເອງເລືອກ ຫຼື ເຂົ້າສອບຖາມທີ່ຫ້ອງການປະກັນສຸຂະພາບປະຈຳເມືອງແຕ່ລະແຂວງ, ວຽກງານຕີເປີເຊັນເສຍກໍາລັງແຮງງານແມ່ນໃຫ້ປະສານມາທາງອົງການປະກັນສັງຄົມແຫ່ງຊາດ ເຊິ່ງຈະຊ່ວຍປະສານຫາຄະນະຕີເປີເຊັນແຕ່ລະປະເພດຊ່ວຍ ເຊິ່ງທຸກບັນຫາສາມາດໂທສອບຖາມໄດ້ທີ່ເບີ 1509. ໃນທີ່ປະຊຸມແມ່ນໄດ້ຮຽກຮ້ອງໃຫ້ຜູ້ເຂົ້າຮ່ວມເຫັນຄວາມໝາຍ ແລະ ຄວາມສຳຄັນຂອງວຽກງານດັ່ງກ່າວ ແລະ ກໍສະເໜີໃຫ້ຈັດກອງປະຊຸມແບບລັກສະນະດັ່ງກ່າວໃຫ້ທຸກກະຊວງ ອີກດ້ວຍ, ກອງປະຊຸມໄດ້ອັດລົງໃນຕອນທ່ຽງຂອງມື້ດຽວກັນ.