ໃນຕອນເຊົ້າຂອງວັນທີ 02 ມິຖຸນາ 2023, ທີ່ ອົງການປະກັນສັງຄົມແຫ່ງຊາດ ໄດ້ມີກອງປະຊຸມການພັດທະນາປື້ມຄູ່ມືສຳລັບເຈົ້າໜ້າທີ່ກວດກາວຽກງານປະກັນສັງຄົມໃນ ສປປ ລາວ ພາຍໃຕ້ການສະໜັບສະໜູນ ຂອງ ອົງການແຮງງານສາກົນ, ໂດຍການເຂົ້າຮ່ວມຂອງ ທ່ານ ທອງພັນ ໄຊຍະລາດ ຮອງຫົວໜ້າອົງການປະກັນສັງຄົມແຫ່ງຊາດ ຫົວໜ້າຄະນະເຈົ້າໜ້າທີ່ກວດກາປະກັນສັງຄົມ, ເຂົ້າຮ່ວມອອນລາຍທາງໄກໂດຍ ທ່ານ ນາງ Marielle Phe Goursat ຫົວໜ້າໂຄງການ ຂອງ ອົງການແຮງງານສາກົນປະຈໍາບາງກອກ, ທ່ານ Luiz Lumbreras ຜູ້ຊ່ຽວຊານວຽກງານກວດກາຈາກປະເທດເບຼຊິນ, ມີເຈົ້າໜ້າທີ່ກວດກາແຮງງານ ກະຊວງ ແຮງງານ ແລະ ສະຫວັດດີການສັງຄົມ ພ້ອມດ້ວຍທີມງານເຈົ້າໜ້າທີ່ກວດກາປະກັນສັງຄົມເຂົ້າຮ່ວມ.

 

ການດຳເນີນງານໃນຄັ້ງນີ້ ຖືເປັນໄລຍະທີ II ຂອງການພັດທະນາໂຄງການດັ່ງກ່າວ ໄດ້ເລີ່ມຂື້ນໄລຍະວັນທີ 29 ພຶດສະພາ - 02 ມິຖຸນາ 2023 ເຊິ່ງໄດ້ມີການຄົ້ນຄ້ວາປັບປຸງບັນດາເນື້ອໃນຂອງຮ່າງປື້ມຄູ່ມືສຳລັບເຈົ້າໜ້າທີ່ກວດກາ ປະກັນສັງຄົມ ທີ່ຕິດພັນກັບບັນດານິຕິກຳ ເຊັ່ນ: ກົດໝາຍ, ຂໍ້ຕົກລົງ ແລະ ບັນດາລະບຽບການຕ່າງໆ. ພາຍໃນກອງປະຊຸມ ຍັງໄດ້ມີການປຶກສາຫາລືຢ່າງກົງໄປກົງມາກ່ຽວກັບບັນຫາສໍາຄັນຕ່າງໆ ໂດຍການອະທິບາຍຊີ້ແຈງ ພ້ອມທັງແນະນຳການຈັດຕັ້ງປະຕິບັດ, ການແກ້ໄຂບັນຫາ ແລະ ຮັບມືໃນກໍລະນີບໍ່ໄດ້ຮັບຄວາມຮ່ວມມືຈາກພາກສ່ວນກ່ຽວຂ້ອງ ໂດຍການແນະນໍາປະສົບການທີ່ດີຂອງເຈົ້າຂອງໂຄງການ, ຜູ້ຊ່ຽວຊານ ແລະ ເຈົ້າໜ້າທີ່ກວດກາແຮງງານ ເຊິ່ງໄດ້ສ້າງຄວາມເຂົ້າໃຈໃຫ້ເຈົ້າໜ້າທີ່ກວດກາປະກັນສັງຄົມ ເລິກເຊິ່ງຍິ່ງຂື້ນ.