ໃນຕອນເຊົ້າຂອງວັນທີ 30 ມັງກອນ 2023 ທີ່ ແຂວງວຽງຈັນ, ອົງການປະກັນສັງຄົມແຫ່ງຊາດ ໄດ້ຈັດກອງປະຊຸມສະພາບໍລິຫານສະໄໝສາມັນ ຄັ້ງທີ VIII ຂອງຕົນຂື້ນ ໂດຍການເປັນປະທານຂອງທ່ານ ນາງ ໃບຄໍາ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນປະທານສະພາບໍລິຫານ ຂອງ ອົງການປະກັນສັງຄົມແຫ່ງຊາດ, ມີຮອງປະທານສະພາບໍລິຫານ ອປຊ, ຄະນະກໍາມະການ, ຄະນະກອງເລຂາ ເຂົ້າຮ່ວມຢ່າງພ້ອມພຽງ.

 

ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໄດ້ລາຍງານຜົນຂອງກອງປະຊຸມສະພາບໍລິຫານຄັ້ງທີ່ຜ່ານມາໂດຍສັງເຂບ ພ້ອມທັງສະແດງໃຫ້ເຫັນເຖິງຜົນສໍາເລັດທີ່ຍາດມາໄດ້ ເປັນຕົ້ນແມ່ນ ການບັນລຸຕົວເລກ ການຂື້ນທະບຽນຜູ້ປະກັນຕົນໃໝ່ ໄດ້ທັງໝົດ 52.435 ຄົນ (ໃນນີ້ ລັດຖະກອນ 2.855 ຄົນ, ຜູ້ສະໝັກໃຈ 5.690 ຄົນ ແລະ ວິສາຫະກິດ 43.890 ຄົນ) ເທົ່າກັບ 166% ຂອງແຜນການປີ, ຕໍ່ກັບສະພາບການແຜ່ລະບາດໂຄວິດ-19 ໄດ້ສົ່ງຜົນກະທົບໂດຍກົງຕໍ່ກັບວຽກງານໂຄສະນາປະຊາສໍາພັນ ເວົ້າສະເພາະກໍ່ຄືການລົງໃຫ້ຂໍ້ມູນເຖິງສະຖານທີ່ ຢູ່ ບັນດາຫົວໜ່ວຍທຸລະກິດໃນຂອບເຂດທົ່ວປະເທດ ສາມາດປະຕິບັດໄດ້ 636 ຄັ້ງ (ໃນນີ້ ສູນກາງ 135 ຄັ້ງ ແລະ ຂັ້ນແຂວງ 501 ຄັ້ງ) ເທົ່າກັບ 80% ຂອງແຜນການປີ ໃນໄລຍະດັ່ງກ່າວໄດ້ມີການຫັນຮູບແບບການໂຄສະນາຜ່ານສື່ອອນໄລຫຼາຍຂື້ນ ໂດຍສະເພາະແມ່ນ ສື່ເຟສບຸກ ແລະ ຈັດກອງປະຊຸມເຜີຍແຜ່ກົດໝາຍປະກັນສັງຄົມ ຜ່ານລະບົບອອນໄລທາງໄກໃຫ້ບັນດາຫົວໜ່ວຍວິສາຫະກິດສາມາດເຂົ້າເຖິງຂໍ້ມູນປະກັນສັງຄົມ. ພ້ອມດຽວກັນນັ້ນ, ກໍ່ໄດ້ສືບຕໍ່ຮັບເອົາບັນດາຄໍາຮ້ອງຮຽນຂອງສະມາຊິກເພື່ອສະຫຼຸບລາຍງານພາກສ່ວນກ່ຽວຂ້ອງໃນການປັບປຸງແກ້ໄຂ ໂດຍສະເພາະບັນຫາຄໍາຮ້ອງຮຽນກ່ຽວກັບຂອດການບໍລິການປິ່ນປົວສຸຂະພາບຢູ່ບັນດາໂຮງໝໍຄູ່ສັນຍາທີ່ເປັນບັນຫາສໍາຄັນ.

 

ພາຍໃນກອງປະຊຸມຍັງໄດ້ຮັບການສະຫຼຸບຕີລາຄາການຈັດຕັ້ງປະຕິບັດບັນດາກິດຈະກໍາ ຂອງ ອປຊ ປະຈໍາປີ 2022 ແລະ ທິດທາງແຜນການ ປະຈໍາປິ 2023 ໂດຍທ່ານ ດຣ ນາງ ບົວຫອມ ພົມມະຈັນ ຮອງຫົວໜ້າອົງການ ປະກັນສັງຄົມແຫ່ງຊາດ ເພື່ອຄົ້ນຄ້ວາປຶກສາຫາລືຕໍ່ກັບບັນຫາສິ່ງທ້າທາຍ ແລະ ຄວາມເປັນເອກກະພາບ ເຊິ່ງຄະນະກໍາມະການສະພາບໍລິຫານ ອປຊ ແຕ່ລະທ່ານກໍ່ໄດ້ສະແດງຄໍາຄິດຄໍາເຫັນຢ່າງມີວິໃສທັດ ແລະ ແບບແຜນວິທະຍາສາດ ເພື່ອເປັນແນວທາງໃນການປະຕິບັດ ເປັນຕົ້ນ ການປະເມີນຜົນໄດ້ຮັບຂອງສື່ໂຄສະນາແຕ່ລະປະເພດເພື່ອຮັບປະກັນໜ້າທີ່ວຽກງານທີ່ມີປະສິດທິຜົນຍິ່ງຂື້ນ, ການຈັດລຽງບຸລິມະສິດວຽກງານເປົ້າໝາຍ ແລະ ວຽກງານປິ່ນອ້ອມ ໃຫ້ເປັນລະບົບ ມີລະບຽບແບບແຜນຍິ່ງຂື້ນ ໂດຍສະເພາະແມ່ນເຮັດວຽກຮ່ວມກັນ ລະຫວ່າງ ຂະແໜງແຮງງານແລະສະຫວັດດີການສັງຄົມ ແລະ ຂະແໜງສາທາລະນະສຸກ ໂດຍເລັ່ງໃສ່ການແກ້ໄຂບັນຫາທີ່ເປັນຫາງສຽງຂອງສັງຄົມ ເພື່ອສ້າງຄວາມເພິ່ງພໍໃຈໃຫ້ຜູ້ມາໃຊ້ບໍລິການປິ່ນປົວສຸຂະພາບຢູ່ໂຮງໝໍນັບມື້ນັບດີຂື້ນ, ພາລະບົດບາດຂອງເຈົ້າໜ້າທີ່ກວດກາປະກັນສັງຄົມຂັ້ນສູນກາງ ແລະ ບັນດາແຜນງານເພື່ອຮອງຮັບໃນອະນາຄົດ.

 

ໃນໂອກາດດັ່ງກ່າວ, ນາງ ໃບຄໍາ ຂັດທິຍະ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນປະທານສະພາບໍລິຫານ ຂອງ ອປຊ ໄດ້ຕີລາຄາສູງຕໍ່ກັບຜົນສໍາເລັດທີ່ອົງການປະກັນສັງຄົມທີ່ຍາດມາໄດ້ ແລະ ຄຽງຄູ່ກັບ ການເພີ່ມທະວີຄວາມເອົາໃຈໃສ່ໃນປັບປຸງບັນຫາຂໍ້ຄົງຄ້າງເພື່ອຮັບປະກັນໃຫ້ວຽກງານມີຜົນສໍາເລັດ, ທ່ານກ່າວວ່າ: ຜ່ານການປະກອບຄໍາຄິດຄໍາເຫັນຂອງຄະນະກໍາມະການສະພາບໍລິຫານ, ອົງການປະກັນສັງຄົມແຫ່ງຊາດ ຈະຕ້ອງ ໄດ້ສືບຕໍ່ນໍາໄປຄົ້ນຄ້ວາປັບປຸງ ນັບແຕ່ໂຄງຮ່າງຂອງບັນດານິຕິກໍາ, ເນື້ອໃນ ລວມທັງວິທີການຈັດຕັ້ງປະຕິບັດແຕ່ລະວຽກງານ, ຂໍ້ກໍານົດວຽກງານທີ່ສາມາດເຊື່ອສານ ແລະ ແຍກອອກຈາກກັນຢ່າງລະອຽດ ເພື່ອໃຫ້ມີຄວາມຊັດເຈນ ແລະ ມີປະສິດທິພາບໃນການດໍາເນີນງານ, ການຈັດໃຫ້ມີກອງປະຊຸມປຶກສາຫາລືຮ່ວມກັບຂະແໜງສາທາລະນະສຸກຢ່າງເປັນປົກກະຕິ ເພື່ອລົງເລິກໃນແຕ່ລະບັນຫາ ໂດຍສະເພາະການເຮັດວຽກຮ່ວມກັບ ຫ້ອງການປະກັນສຸຂະພາບ ແຫ່ງຊາດ ໂດຍການມີສ່ວນຮ່ວມ ແລະ ເປັນເຈົ້າການຂອງຄະນະກໍາມະການສະພາບໍລິຫານ ອປຊ ແລະ ສະພາບໍລິຫານຂອງຂະແໜງສາທາລະນະສຸກ, ການມີສ່ວນຮ່ວມຂອງບັນດາໂຮງໝໍຄູ່ສັນຍາ ແລະ ຫົວໜ່ວຍວິສາຫະກິດ ໂດຍມອບໃຫ້ ອປຊ ເປັນເຈົ້າການໃນການຫ້າງຫາກະກຽມເນື້ອໃນເພື່ອຊຸກຍູ້ກອງປະຊຸມດັ່ງກ່າວເກີດຂື້ນຕາມຄວາມຮຽກຮ້ອງຕ້ອງການຂອງວຽກງານ ພ້ອມທັງມີການຕິດຕາມ ແລະ ປະເມີນຜົນສໍາເລັດ ຂອງກອງປະຊຸມ ສະຫຼຸບລາຍງານເປັນແຕ່ລະໄລຍະຢ່າງເປັນປົກກະຕິ, ທົບທວນຄືນການຄິດໄລ່ອັດຕາເງິນສົມທົບການປິ່ນປົວສຸຂະພາບທີ່ໄດ້ມອບໂອນເຂົ້າຂະແໜງສາທາລະນະສຸກ ເພື່ອໃຫ້ແທດເໝາະ ແລະ ເຫັນໄດ້ສະພາບການຕົວຈິງ ເພື່ອສະຫຼຸບລາຍງານລັດຖະບານຂໍທິດຊີ້ນໍາ ແລະ ການປັບປຸງບັນດານິຕິກໍາທີ່ເປັນລະບຽບການ ແລະ ກົດໝາຍປະກັນສັງຄົມ ໃຫ້ມີຄວາມສອດຄ່ອງ ແລະ ເໝາະສົມຍິ່ງຂື້ນ, ເອົາໃຈໃສ່ໃນການໃນການຈັດບຸລິມະສິດວຽກງານທີ່ເປັນ ຄາດໝາຍສູ້ຊົນ ປະຕິບັດຕາມ 3 ຫຼັກການຂອງລັດຖະບານ ກໍ່ຄື ເດັດຂາດ ໂປ່ງໃສ ແລະ ເປັນມືອາຊີບ, ຄຽງຄູ່ກັບການໃກ້ສິດຕິດແທດ ແລະ ຄວາມເປັນເຈົ້າການຂອງຄະນະກໍາມະການສະພາບໍລິຫານ ໃນການເຂົ້າຮ່ວມຕິດຕາມ ກອງປະຊຸມປຶກສາຫາລືທີ່ກ່ຽວຂ້ອງ ແລະ ຊຸກຍູ້ວຽກງານສະຫວັດດີການສັງຄົມຕາມພາລະບົດບາດຄວາມຮັບຜິດຊອບໃນຂະແໜງການຂອງຕົນ ໂດຍມີການຕິດຕາມ ແລະ ປະເມີນການຈັດຕັ້ງປະຕິບັດໃນແຕ່ລະໄລຍະ ເພື່ອຮັບປະກັນ ໃຫ້ວຽກງານດັ່ງກ່າວສໍາເລັດຕາມຄາດໝາຍທີ່ໄດ້ກໍານົດໄວ້. ກອງປະຊຸມສະພາບໍລິຫານສະໄໝສາມັນ ຄັ້ງທີ VIII ຂອງ ອົງການປະກັນສັງຄົມແຫ່ງຊາດ ໄດ້ສໍາເລັດລົງໃນເວລາ 12:30 ໂມງ ຂອງມື້ດຽວກັນ.