ເພື່ອເປັນການທົບທວນການຈັດຕັ້ງປະຕິບັດວຽກງານປະກັນສັງຄົມໃນໄລຍະ 01 ປີ ທີ່ຜ່ານມາ ເວົ້າລວມ ເວົ້າສະເພາະກໍ່ຄື ການບັນລຸຕົວເລກຄາດໝາຍສູ້ຊົນໃນປີ 2022. ໃນລະຫວ່າງວັນທີ 12-13 ມັງກອນ 2023, ອົງການປະກັນສັງຄົມແຫ່ງຊາດ (ອປຊ) ໄດ້ຈັດກອງປະຊຸມຖອດຖອນບົດຮຽນການຈັດຕັ້ງປະຕິບັດວຽກງານ ປະຈໍາປີ 2022 ແລະ ກໍານົດທິດທາງແຜນການ ປະຈໍາປີ 2023 ທີ່ ເມືອງວັງວຽງ ແຂວງວຽງຈັນ, ພາຍໃຕ້ການເປັນປະທານຂອງ ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ທັງເປັນຮອງປະທານສະພາບໍລິຫານ ອປຊ, ມີຄະນະອົງການ, ຜູ້ຕາງໜ້າຈາກບັນດາກົມພາຍໃນ ກະຊວງ ຮສສ, ບັນດາພະແນກການ, ຫ້ອງການປະກັນສັງຄົມແຂວງ, ສູນບໍລິການປະກັນສັງຄົມເມືອງ ພ້ອມດ້ວຍພະນັກງານວິຊາການ ອປຊ ທົ່ວປະເທດ ເຂົ້າຮ່ວມຢ່າງພ້ອມພຽງ.

 

ທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດ ໄດ້ໃຫ້ກຽດຂື້ນກ່າວຄວາມໝາຍຄວາມສໍາຄັນ ແລະ ເປີດປະຊຸມປະຈໍາປີ 2022 ຂອງ ອປຊ ຂື້ນຢ່າງເປັນທາງການ, ທ່ານກ່າວວ່າ: ຜ່ານການຈັດຕັ້ງປະຕິບັດ ວຽກງານໃນໄລຍະໜຶ່ງປີຜ່ານມາ ອົງການປະກັນສັງຄົມແຫ່ງຊາດພວກເຮົາໄດ້ມີຄວາມພະຍາຍາມ ທຸ້ມເທເຫື່ອແຮງ ແລະ ສະຕິປັນຍາ ເຂົ້າໃນການປະຕິບັດວຽກງານຕາມຄວາມຮັບຜິດຊອບຂອງຕົນ ດ້ວຍຄວາມຫ້າວຫັນ ແລະ ຄວາມຮັບຜິດຊອບສູງ ເຫັນໄດ້ວ່າມີຫຼາຍດ້ານທີ່ສາມາດບັນລຸຕາມລະດັບຄາດໝາຍ ແລະ ມີສິ່ງໃໝ່ໆຫຼາຍຢ່າງເກີດຂຶ້ນໃນໄລຍະເວລາອັນສັ້ນໆ ເປັນຕົ້ນແມ່ນການຜັນຂະຫຍາຍນິຕິກໍາລຸ່ມກົດໝາຍ, ການຈັດຕັ້ງປະຕິບັດຕົວເລກ ຄາດໝາຍສູ້ຊົນ ແລະ ແຜນວຽກຈຸດສຸມທີ່ໄດ້ກຳນົດໄວ້, ຜົນງານອັນໂດດເດັ່ນກວ່າໝູ່ກໍ່ແມ່ນການເປັນເຈົ້າພາບຈັດກອງປະຊຸມສະມາຄົມປະກັນສັງຄົມອາຊຽນ (ASSA) ຄັ້ງທີ 39 ທີ່ ນະຄອນຫຼວງພະບາງ ແຂວງຫຼວງພະບາງ ດ້ວຍຜົນສໍາເລັດອັນຈົບງາມ ເຊິ່ງທັງໝົດນັ້ນກໍ່ດ້ວຍຄວາມພະຍາຍາມໃນການຈັດຕັ້ງປະຕິບັດໜ້າທີ່ຕາມພາລະບົດບາດດ້ວຍຄວາມຮັບຜິດຊອບຂອງບັນດາອ້າຍເອື້ອຍນ້ອງພະນັກງານໝົດທຸກຄົນ.

 

ກອງປະຊຸມໄດ້ຮັບຟັງການລາຍງານການຈັດຕັ້ງປະຕິບັດວຽກງານປະກັນສັງຄົມໃນໄລຍະ 01 ປີ ທີ່ຜ່ານມາ ໂດຍທ່ານ ນາງ ບົວຫອມ ພົມມະຈັນ ຮອງຫົວໜ້າອົງການປະກັນສັງຄົມແຫ່ງຊາດ, ເຊິ່ງທ່ານໄດ້ສະແດງໃຫ້ເຫັນເຖິງຜົນ ຂອງການປະຕິບັດຕົວເລກຄາດໝາຍສູ້ຊົນທີ່ຍາດມາໄດ້ ເຊັ່ນ: ການຂຶຶ້ນທະບຽນຫົວໜ່ວຍວິສາຫະກິດໃໝ່ໄດ້ທັງໝົດ 347 ຫົວໜ່ວຍ ເທົ່າກັບ 99,14% ຂອງແຜນການປີ, ຂຶ້ນທະບຽນຜູ້ປະກັນຕົນໃໝ່ໄດ້ທັງໝົດ 52.435 ຄົນ ເທົ່າກັບ 166% ຂອງແຜນການປີ, ໃນນີ້ຂຶ້ນທະບຽນພະນັກງານ-ລັດຖະກອນໄດ້ 2.855 ຄົນ ເທົ່າກັບ 190,33% ຂອງແຜນການປີ, ຂຶ້ນທະບຽນຜູ້ອອກແຮງງານໃໝ່ຈາກວິສະຫະກິດເກົ່າ-ໃໝ່ ໃນຫົວໜ່ວຍວິສາຫະກິດໄດ້ 43.890 ຄົນ ເທົ່າກັບ 163,47% ຂອງແຜນການປີ, ຮັບຜູ້ສະໝັກໃຈເຂົ້າປະກັນສັງຄົມໄດ້ 5.690 ຄົນ ເທົ່າກັບ 189,66% ຂອງແຜນການປີ; ໄດ້ພິຈາລະນາ ແລະ ຄິດໄລ່ອຸດໜູນປະເພດຕ່າງໆທັງໝົດ 136.425 ຄົນ ເທົ່າ 112,07% ມີ 692.769 ເທື່ອຈ່າຍ, ໃນນີ້ພາກລັດມີ 57.387 ເທື່ອຄົນ, ພາກວິສາຫະກິດ ແລະ ຜູ້ສະໝັກໃຈ ມີ 79.038 ເທື່ອຄົນ. ປະຈຸບັນມີຜູ້ປະກັນຕົນທີ່ຂຶ້ນທະບຽນ ແລະ ຈ່າຍເງິນສົມທົບທັງໝົດ 346.034 ຄົນ, ຍິງ 165.497 ຄົນ (ບໍ່ລວມພາກສ່ວນ ປກຊ, ປກສ) ໃນນີ້ ຜູ້ປະກັນຕົນຈາກພາກລັດ 177.925 ຄົນ, ຍິງ 84.014 ຄົນ, ພາກວິສາຫະກິດ 147.644 ຄົນ, ຍິງ 72.532 ຄົນ ແລະ ຜູ້ສະໝັກໃຈ 20.465 ຄົນ, ຍິງ 8.951 ຄົນ. ມີຜູ້ເກີດສິດປິ່ນປົວ ສຸຂະພາບລວມທັງສະມາຊິກຄອບຄົວຂອງເຂົາເຈົ້າທັງໝົດ 819.562 ຄົນ ເທົ່າ 99,12% ຂອງແຜນການປີ. ສໍາລັບວຽກງານຈຸມສຸມ ໄດ້ສໍາເລັດການປັບປຸງນິຕິກໍາ ຂໍ້ຕົກລົງວ່າດ້ວຍການຈັດຕັ້ງ ແລະ ການເຄື່ອນໄຫວຂອງອົງການ ປະກັນສັງຄົມແຫ່ງຊາດ ຂັ້ນສູນກາງ ຂັ້ນແຂວງ ແລະ ສູນບໍລິການປະກັນສັງຄົມ ຂັ້ນເມືອງ, ປັບປຸງຄໍາແນະນໍາ (ສະບັບປັບປຸງ) ການຈັດຕັ້ງປະຕິບັດກົດໝາຍວ່າດ້ວຍການປະກັນສັງຄົມ; ສໍາເລັດການປະເມີນຄືນການເຄື່ອນໄຫວ ຈັດຕັ້ງປະຕິບັດວຽກງານບັນດາສູນບໍລິການປະກັນສັງຄົມ 05 ເມືອງທີ່ໄດ້ຈັດຕັ້ງປະຕິບັດຜ່ານມາ ແລະ ເກັບກໍາຂໍ້ມູນ 05 ເມືອງເປົ້າໝາຍ ເພື່ອຂະຫຍາຍໃໝ່ ເຊິ່ງໄດ້ຮັບການອະນຸມັດສອງເມືອງ ຄື: ເມືອງປາກຊ່ອງ ແຂວງຈໍາປາສັກ ແລະ ເມືອງຮຸນ ແຂວງອຸດົມໄຊ; ສຳເລັດການປັບປຸງສັບຊ້ອນຍົກຍ້າຍພະນັກງານຂັ້ນຫົວໜ້າພະແນກພາຍໃນ ອປຊ ຈຳນວນ 09 ພະແນກ, ການປະກາດການຈັດຕັ້ງການໂຮມຕົວລະຫວ່າງຂະແໜງປະກັນສັງຄົມກັບສູນບໍລິການປະກັນສັງຄົມ ແຂວງ ຄຳມ່ວນ ແລະ ແຂວງ ເຊກອງ; ສໍາເລັດກອງປະຊຸມສະພາບໍລິຫານອົງການປະກັນສັງຄົມແຫ່ງຊາດ ສະໄໝສາມັນ 03 ຄັ້ງ, ສະໄໝວິສາມັນ 01 ຄັ້ງ ແລະ ການຈັດກອງປະຊຸມຖອດຖອນ ບົດຮຽນກ່ຽວກັບການຈັດຕັ້ງປະຕິບັດວຽກງານປະກັນສັງຄົມໃນຂອບເຂດທົ່ວປະເທດປະຈໍາປີ 2021; ສໍາເລັດການຈັດຝຶກອົບຮົມໃຫ້ພະນັກງານຢູ່ຂັ້ນສູນກາງ 6 ຄັ້ງ ຄື: ການບໍລິຫານໂຄງການ, ການບໍລິການດ້ວຍໃຈ 02 ຄັ້ງ, ວຽກງານບັນຊີ, ວຽກງານບໍລິການປະຕູດຽວ, ການກໍານົດຕໍາແໜ່ງງານ ມີຜູ້ເຂົ້າຮ່ວມທັງໝົດ 138 ເທື່ອຄົນ ຍິງ 53 ເທື່ອຄົນ ແລະ ຝຶກອົບຮົມໃຫ້ພະນັກງານປະກັນສັງຄົມທົ່ວປະເທດ 3 ຄັ້ງ: ວຽກງານເງິນອຸດໜູນ, ໂປຼແກຼມທະບຽນ ແລະ ເງິນສົມທົບ ພາກວິສາຫະກິດ ມີຜູ້ເຂົ້າຮ່ວມທັງໝົດ 105 ຄົນ ຍິງ 65 ຄົນ; ໄດ້ຮັບການສະໜັບສະໜູນ ທາງດ້ານ ວິຊາການ ແລະ ງົບປະມານຈາກໂຄງການ ILO-SOLAR , ILO-Korea, ILO-EU, ILO-Luxembourg ເພື່ອຂະຫຍາຍອັດຕາປົກຄຸມປະກັນສັງຄົມສູ່ແຮງງານນອກລະບົບຂະແໜງ ຊາ ແລະ ກາເຟ, ສ້າງຄວາມເຂັ້ມແຂງໃຫ້ພະນັກງານ ອປຊ ໃນການຄຳນວນຄະນິດສາດປະກັນສັງຄົມ, ຈັດກອງປະຊຸມ ແລະ ຝຶກອົບຮົມວຽກງານກວດກາ, ວຽກງານປະຊາສໍາພັນ, ບົດຮຽນ ແລະ ວິທີການພິຈາລະນາອຸດໜູນອຸປະຕິເຫດແຮງງານ ແລະ ພະຍາດອາຊີບ; ໄດ້ຈັດກອງປະຊຸມຂັ້ນການນຳສອງກະຊວງ (ກະຊວງ ຮສສ ແລະ ກະຊວງ ສາທາລະນະສຸກ) ເພື່ອປຶກສາຫາລື ແລະ ຊອກວິທີແກ້ໄຂບັນຫາການຈັດຕັ້ງປະຕິບັດວຽກງານປິ່ນປົວສຸຂະພາບ; ສໍາເລັດການກວດສອບ ປະຈໍາປີ 2021 ຈາກອົງການກວດສອບແຫ່ງລັດ; ສໍາເລັດການແຕ່ງຕັ້ງເຈົ້າໜ້າທີ່ກວດກາ ວຽກງານປະກັນສັງຄົມ ຢູ່ຂັ້ນສູນກາງ; ສຳເລັດການເຊັນບົດບັນທຶກການຮ່ວມມື ກັບປະກັນສັງຄົມຫວຽດນາມ ໃນໄລຍະປີ 2022-2025; ສຳເລັດການເປັນເຈົ້າພາບຈັດກອງປະຊຸມ ສະມາຄົມປະກັນສັງຄົມອາຊຽນ (ASSA) ຄັ້ງທີ 39 ທີ່ແຂວງ ຫຼວງພະບາງ ແລະ ອື່ນໆ.

 

ເພື່ອເຮັດໃຫ້ກອງປະຊຸມມີເນື້ອໃນ ແລະ ຄວາມໝາຍຄວາມສໍາຄັນຍິ່ງຂື້ນ, ກອງປະຊຸມ ຍັງໄດ້ຮັບຟັງການໂອ້ລົມຂອງທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ເຊິ່ງທ່ານໄດ້ຕີລາຄາສູງຕໍ່ກັບຜົນສໍາເລັດທີ່ອົງການປະກັນສັງຄົມແຫ່ງຊາດຍາດມາໄດ້ ພ້ອມທັງຮຽກຮ້ອງໃຫ້ເພີ່ມທະວີການວຽກງານໂຄສະນາປະຊາສໍາພັນດ້ວຍຫຼາຍຮູບການ ເພື່ອຮັບປະກັນໃນການສະໜອງຂໍ້ມູນປະກັນສັງຄົມ ເຂົ້າເຖິງກຸ່ມເປົ້າໝາຍທົ່ວສັງຄົມ ແລະ ທັງເປັນການຕຸກຊຸກຍູ້ໃຫ້ສັງຄົມເຫັນໄດ້ເຖິງຄວາມສໍາຄັນຂອງວຽກງານດັ່ງກ່າວນັບມື້ນັບຫຼາຍຂື້ນ ເຮັດໃຫ້ທຸກຄົນໃນສັງຄົມ ໄດ້ເຂົ້າເຖິງການບໍລິການປິ່ນປົວສຸຂະພາບ ແລະ ການຄຸ້ມຄອງ ທາງດ້ານສະຫວັດດີການສັງຄົມ ເວົ້າສະເພາະກໍ່ຄື ການຄຸ້ມຄອງອຸດໜູນປະເພດຕ່າງໆພາຍໃຕ້ກົດໝາຍ, ຄຽງຄູ່ກັບການເພີ່ມທະວີຄວາມເອົາໃຈໃສ່ໃນວຽກງານກວດກາ ແລະ ປັບປຸງບັນດານິຕິກໍາລຸ່ມກົດໝາຍໃຫ້ຖືກຕ້ອງ ສອດຄ່ອງ ແລະ ເໝາະສົມກັບການປະຕິບັດວຽກງານຕົວຈິງຢ່າງມີປະສິດທິພາບ ພ້ອມທັງສະກັດກັ້ນບັນຫາຊ່ອງວ່າງ ແລະ ປະກົດການຫຍໍ້ທໍ້ຕ່າງໆ ເພື່ອເສີມຂະຫຍາຍກອງທຶນໃຫ້ມີຄວາມໝັ້ນຄົງ ແລະ ຍືນຍົງ.