ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ກ່າວໃນບາງຕອນວ່າ: “ລັດຖະບານ ສປປ ລາວ ຖືສຳຄັນຕໍ່ວຽກງານປະກັນສັງຄົມໄດ້ມີນະໂຍບາຍຊຸກຍູ້ ແລະ ສົ່ງເສີມການພັດທະນາວຽກງານ ປະກັນສັງຄົມໃຫ້ດຳເນີນໄປຄຽງຄູ່ກັບການເຕີບໂຕທາງດ້ານເສດຖະກິດ. ດັ່ງນັ້ນ, ວຽກງານປະກັນສັງຄົມຈຶ່ງໄດ້ຮັບການຈັດຕັ້ງຜັນຂະຫຍາຍຢ່າງສອດຄ່ອງກັບແຜນພັດທະນາວຽກງານແຮງງານ ແລະ ສະຫວັດດີການສັງຄົມ, ແຜນພັດທະນາເສດຖະກິດ-ສັງຄົມແຫ່ງຊາດ ໃນແຕ່ລະໄລຍະ ແລະ ບັນດາຖະແຫຼງການອາຊຽນ ທີ່ຕິດພັນກັບວຽກປົກປ້ອງສັງຄົມເຮັດໃຫ້ວຽກງານປະກັນສັງຄົມໄດ້ຮັບການພັດທະນາຢ່າງຕໍ່ເນື່ອງ ແລະ ເປັນຮູບປະທຳດີຂື້ນຫຼາຍດ້ານ. ສໍາລັບແຜນການໃນຕໍ່ຫນ້າ ສປປ ລາວ ຈະໄດ້ສືບຕໍ່ຈັດຕັ້ງປະ ຕິບັດບັນດາຖະແຫລງ ການທີ່ກ່ຽວຂ້ອງຂອງອາຊຽນ ແລະ ເປົ້າຫມາຍການພັດທະນາແບບຍືນຍົງເພື່ອສຸມໃສ່ການພັດທະນາວຽກງານປົກປ້ອງສັງຄົມສ້າງໂອກາດ ແລະ ເງື່ອນໄຂໃຫ້ບັນດາກຸ່ມເປົ້າຫມາຍໄດ້ຮັບການປົກປ້ອງຈາກລະບົບປະກັນສັງຄົມຢ່າງກວ້າງຂວາງໃນຂອບເຂດທົ່ວປະເທດ, ສືບຕໍ່ແລກປ່ຽນ-ຖອດຖອນບົດຮຽນ ກ່ຽວກັບວຽກງານປະກັນສັງຄົມນໍາບັນດາປະເທດໃນຂົງເຂດອາຊຽນ ກໍຄື ສາກົນ ເພື່ອພັດທະນາລະບົບປະກັນສັງຄົມພາຍໃນປະເທດໃຫ້ດີຂຶ້ນເປັນກ້າວໆ. ພວກເຮົາຈຶ່ງມີຄວາມພາກພູມໃຈເປັນພິເສດທີ່ອົງການປະກັນສັງຄົມແຫ່ງຊາດ ຂອງ ສປປ ລາວ ໄດ້ສືບຕໍ່ເປັນສະມາຊິກສະມາຄົມປະກັນສັງຄົມອາຊຽນ, ຊຶ່ງຈະເປັນເງື່ອນໄຂອັນດີໃຫ້ແກ່ ສປປ ລາວ ກໍຄືບັນດາປະເທດສະມາຊິກໃນການແລກປ່ຽນບົດຮຽນປະກັນສັງຄົມຊຶ່ງກັນ ແລະ ກັນເປັນແຕ່ລະໄລຍະ”

ສໍາລັບເນື້ອໃນກອງປະຊຸມແມ່ນໄດ້ທົບທວນຄືນ ແລະ ຮັບຮອງວາລະ ແລະ ເນື້ອໃນກອງປະຊຸມອາຊາຄັ້ງທີ 38, ມີວາລະໃນການມອບລາງວັນໃຫ້ບັນດາປະເທດສະມາຊິກປະກັນສັງຄົມອາຊຽນ ທີ່ໄດ້ມີຜົນງານດີເດັ່ນໃນການຈັດຕັ້ງປະຕິບັດວຽກງານປະກັນສັງຄົມ. ພ້ອມກັນນັ້ນ ກໍ່ໄດ້ມີການແຕ່ງຕັ້ງປະທານກອງປະຊຸມສະມາຄົມປະກັນສັງຄົມອາຊຽນຜູ້ໃໝ່ ໂດຍແມ່ນທ່ານ ນາງ ແກ້ວ ຈັນທະວີໄຊ ຫົວໜ້າອົງການປະກັນສັງຄົມແຫ່ງຊາດລາວ ເຊິ່ງເປັນແມ່ຍິງຄົນທຳອິດທີ່ໄດ້ຮັບກຽດເປັນປະທານກອງປະຊຸມດັ່ງກ່າວ ນັບແຕ່ມີການກໍ່ຕັ້ງສະມາຄົມປະກັນສັງຄົມອາຊຽນຄົບຮອບ 25 ປີ, ຮອງປະທານ ແລະ ເລຂາທິການ ສະມາຄົມປະກັນສັງຄົມອາຊຽນ ຜູ້ໃໝ່ ໂດຍແມ່ນທ່ານ ນາງ ບົວຫອມ ພົມມະຈັນຮອງຫົວໜ້າອົງການປະກັນສັງຄົມແຫ່ງຊາດ. ທ່ານປະທານສະມາຄົມປະກັນສັງຄົມອາຊຽນ ຜູ້ເກົ່າ ຈາກປະເທດອິນໂດເນເຊຍ ໄດ້ມອບສັນຍາລັກ ອາຊາ ແລະ ເອກະສານທີ່ກ່ຽວຂ້ອງໃຫ້ກັບ ປະເທດລາວ ໃນນາມປະທານສະມາຄົມປະກັນສັງຄົມອາຊຽນ ຜູ້ໃໝ່. ນອກຈາກນັ້ນ ກອງປະຊຸມ ກໍ່ໄດ້ສົນທະນາປຶກສາຫາລື, ນຳສະເໜີຫຼາຍປະເດັນຮ່ວມກັນ ຊຶ່ງບາງປະເທດກໍ່ໄດ້ຍົກປະເດັນທີ່ເປັນລັກສະນະລວມ ແລະ ບາງປະເທດກໍ່ໄດ້ຍົກປະເດັນທີ່ເປັນລັກສະນະສະເພາະ ຕໍ່ກອງປະຊຸມເພື່ອແລກປ່ຽນບົດຮຽນນຳກັນ. ພ້ອມກັນນີ້ພວກເຮົາຍັງໄດ້ພ້ອມກັນມີຄໍາເຫັນຕໍ່ແຜນການກະກຽມຈັດກອງປະຊຸມ ອາຊຽນ ຄັ້ງທີ 40 ທີ່ປະເທດ ມາເລເຊຍ ຈະເປັນເຈົ້າພາບ, ຊຶ່ງລາຍລະອຽດຕ່າງໆ, ໄລຍະເວລາ, ການຈັດກອງປະຊຸມ, ຫົວຂໍ້ບົດສົນທະນາ ແລະ ບົດຮຽນທີ່ດີ ທີ່ຈະນໍາມາສະເໜີ ແມ່ນມອບໃຫ້ກອງເລຂາສະມາຄົມປະກັນສັງຄົມອາຊຽນ ສຶບຕໍ່ປະຊຸມປືກສາຫາລື ແລະ ຕົກລົງເພື່ອຄວາມເປັນເອກກະພາບກັນພາຍຫຼັງ.

 

ກອງປະຊຸມສຳມະນາຄັ້ງນີ້ໄດ້ຮັບການສະໜັບສະໜູນທາງດ້ານງົບປະມານຈາກສະຫະພາບເອີລົບ, ໂດຍຜ່ານໂຄງການ “ປັບປຸງກອບການຮ່ວມມືລະຫວ່າງລະບົບປົກປ້ອງສັງຄົມ ແລະ ການຄຸ້ມຄອງການເງິນພາກລັດ (SP&PFM)”. ໂຄງການດັ່ງກ່າວມີການປະກອບສ່ວນເຂົ້າ ໃນຂະບວນການສ້າງຄວາມເຂັ້ມແຂງໃຫ້ແກ່ລະບົບປະກັນສັງຄົມໃນ ສປປ ລາວ ທີ່ສາມາດປົກປ້ອງປະຊາຊົນຈາກຄວາມສ່ຽງຂອງວົງຈອນຊີວິດ, ໄພພິບັດທໍາມະຊາດ ແລະ ວິກິດການຕ່າງໆ, ເຊິ່ງເປັນການປະເມີນຄວາມຍືນຍົງດ້ານການເງິນ ແລະ ເປັນການກະກຽມຍຸດທະສາດທີ່ອີງໃສ່ຫຼັກຖານຕ່າງໆ ເພື່ອຂະຫຍາຍການປົກຄຸມສູ່ແຮງງານນອກລະບົບ.